«Ամերիկայի Ձայն». «Human Rights Watch». «Հարձակման իրականացման համար Սիրիայի ընդդիմությանը ներկայացվող մեղադրանքներն անհիմն են և չեն համապատասխանում կազմակերպության կողմից ստացված ապացույցներին»
«Human Rights Watch» իրավապաշտպան կազմակերպության համաձայն, Սիրիայի իշխանությունները «գրեթե անկասկած պատասխանատու» են հարյուրավոր մարդկանց մահվան պատճառը դարձած՝ քիմիական զենքի կիրառմամբ հարձակումն իրականացնելու համար:
Կազմակերպության կողմից երեքշաբթի օրը հրապարակված նոր զեկույցի համաձայն, հարձակման իրականացման ժամանակ օգտագործված հրթիռների տեսակը, հարձակման վայրում արված լուսանկարներն ու տեսագրությունները, ինչպես նաև տուժածների և բժիշկների հետ անցկացված հարցազրույցները վկայում են այս հարձակմանը Սիրիայի կառավարական ուժերի մասնակցության մասին:
«Human Rights Watch»-ի համաձայն, այս հարձակման իրականացման համար Սիրիայի ընդդիմությանը ներկայացվող մեղադրանքներն անհիմն են և չեն համապատասխանում կազմակերպության կողմից ստացված ապացույցներին:
Կարդացեք նաև
Կազմակերպության արտակարգ իրավիճակների հարցերով տնօրեն Փիթեր Բուքերթն ասել է, որ այս հարձակումը պետք է «նոր ուղղություն հաղորդի քիմիական զենքի օգտագործման կանխարգելման և Սիրիայի խաղաղ բնակչության պաշտպանության շուրջ միջազգային հանրության քննարկումներին»:
Հիշեցնենք, որ Ռուսաստանի արտգործնախարար Սերգեյ Լավրովը նախօրեին, արձագանքելով ԱՄՆ-ի իր գործընկեր Ջոն Քերիի խոսքերին, ասել էր, որ Մոսկվան կաշխատի ստիպել Սիրիայի իշխանություններին միջազգային այնպիսի վերահսկողության տակ դնել քիմիական իր զենքերը, որպեսզի դրանք հնարավոր լինի ոչնչացնել:
Սիրիայի արտգործնախարար Վալիդ ալ-Մոալեմը հավանության է արժանացրել Ռուսաստանի կողմից առաջադրված ծրագիրը՝ ասելով, որ դրա իրականացման միջոցով հնարավոր կդառնա, իր խոսքերով, «խուսափել ԱՄՆ-ի ագրեսիայից»:
ԱՄՆ-ի անվտանգության գծով ազգային խորհրդատուի տեղակալ Թոնի Բլինքենը, արձագանքելով Ռուսատանի առաջարկին, ասել էր, որ Միացյալ Նահանգները «ուշադիր կուսումնասիրի» Ռուսաստանի այդ նախաձեռնությունը:
Արմեն Հովհաննիսյան
