Այսօր Վերաքննիչ քրեական դատարանում ՀԱԿ ակտիվիստների դատավարության ընթացքում դատավորը ներկայացրեց պաշտպան Մուշեղ Շուշանյանի միջնորդության պատասխանը՝ «ՎիվաՍելլից»:
Հիշեցնենք, որ Մուշեղ Շուշանյանը դատական նիստերից մեկի ընթացքում ասել էր, որ տուժող Շահեն Հարությունյանը իր հեռախոսով միջադեպը նկարահանել է. «Շահեն Հարությունյանն ասաց, որ չի հիշում՝ որքան ժամանակ է տեւել նկարահանումը, բայց որոշ ժամանակ նկարել է, հետո իր ձեռքին հարվածել են, հեռախոսն ընկել կորել է»:
Շահեն Հարությունյանի ասածի իսկությունը ստուգելու նպատակով նա առաջարկել էր «Ղ-Տելեկոմի» միջոցով ճշտել, թե ինչ հեռախոսի մեջ է եղել իր նշած հեռախոսահամարը, ում անվամբ է գրանցված եղել այդ հեռախոսաքարտը, վերականգնվե՞լ է այն, եթե այո, ապա ե՞րբ:
Այսօր դատավոր Եվա Դարբինյանը տրամադրեց օպերատորի ներկայացրած պատասխանը, բայց այն դեռ ուսումնասիրման կարիք ունի կողմերի կողմից:
Կարդացեք նաև
ՀԱԿ ակտիվիստների պաշտպան Ստեփան Ոսկանյանը այսօր եւս մեկ անգամ միջնորդություն ներկայացրեց՝ պահանջելով Տիգրան Առաքելյանի խափանման միջոցը փոխել եւ նրան կալանքից ազատ արձակել:
Միջնորդությանը կցված էր նաեւ ՀԱԿ, ՀՅԴ, ԲՀԿ, Ժառանգություն կուսակցությունների անունից սեպտեմբերի 9-ի հայտարարությունը, ըստ որի, ԵԽԽՎ-ն իր բանաձեւերից մեկում քաղբանտարկյալի չափորոշիչներն է ներկայացրել եւ կոչ արել այդ չափանիշներով գործերը վերանայել, իսկ Տիգրան Առաքելյանը համապատասխանում է այդ չափորոշիչներով քաղբանտարկյալ տերմինին: Դա, ըստ կուսակցությունների, Հայաստանի հեղինակությունը միջազգային կառույցներում վնասում է:
Միջնորդության մեջ կուսակցությունները կոչ են արել Տիգրան Առաքելյանի խափանման միջոցը փոխել:
Դատավորը ճշտեց՝ նախորդ միջնորդություններից հետո, երբ դուք ներկայացել էիք Տիգրան Առաքելյանի խափանման միջոցը փոխելու վերաբերյալ, որեւէ բան փոխվե՞լ է:
Պաշտպանն ասաց, որ որեւէ հիմնավորում եւ պատճառաբանություն չի եղել՝ խափանման միջոցն անփոփոխ թողնելու վերաբերյալ:
Տիգրան Առաքելյանի խոսքերով՝ «Մի օրինակ բերեմ՝ եթե գնանք կոշկակարի մոտ կոշիկ պատվիրենք, իրեն պետք է նյութ տանք: Երբ տալիս են ստվարաթուղթ, պարզ է, որ այդ կոշիկը պատռվելու է: Այդ կոշիկն են պատվիրել, որ պատռվում է եւ այդ կոշիկով են, որ բոբիկ են միջազգային կառույցներում»:
Հռիփսիմե ՋԵԲԵՋՅԱՆ
