Քաղաքական դաշտի, հասարակական ոլորտի ներկայացուցիչներn այսօր քննարկեցին «Հաղթահարելով փակուղին» ծրագրի շրջանակներում Բաքվի, Երևանի և Ստեփանակերտի փորձագետների կողմից մշակված ղարաբաղյան հակամարտության կարգավորմանն ուղղված առաջարկները, հակամարտության կողմերի պետական և հասարակական ոլորտների ներկայացուցիչների հետագա քայլերը:
Նշենք, որ Թբիլիսիում հունիսի 15-18-ը կազմակերպված քննարկման արդյունքում ընդունվել է համատեղ առաջարկությունների փաստաթուղթ, որտեղ, մասնավորապես անդրադարձ է կատարվում շփման գծում հրադադարի ռեժիմի խախտման դեպքերի դատապարտմանը, այս առումով հասարակական վերահսկողությանը, դասագրքերի մոնիթորինգին, համագործակցային մթնոլորտի ստեղծմանը:
Քաղաքական վերլուծաբան, ԲՀԿ-ական Արամ Սաֆարյանը զարմացած է, որ այս փաստաթղթի տակ ստորագրել է Ադրբեջանը: Նա նշեց. «Եթե իրենց հակառակ ուժը ճնշի, նահանջ է սպասվելու, ու եթե այս տեմպերով գնանք, հնարավոր է հաճելիորեն զարմանանք»:
«Կովկաս» ինստիտուտի փոխտնօրեն Սերգեյ Մինասյանը կարևորեց այն հանգամանքը, որ փաստաթղթում դրույթներ կան շփման գծի, հրադադարի ռեժիմի հասարակական վերահսկողության մասին:
Կարդացեք նաև
ԼՂՀ-ում ծրագրի համակարգող Իրինա Գրիգորյանը մտահոգություն հայտնեց, որ վերջին շրջանում միտում է նկատվում, որ իրականացվող բազմաթիվ նախագծերից քչերն են ԼՂՀ-ն համարում ինքնուրույն սուբյեկտ: Նա մանրամասնեց. «Ադրբեջանի հիմնական նպատակը կոնֆլիկտը այլ հարթություն տեղափոխելն է, և այս տարիների ընթացքում մեր հիմնական պայքարն ընթացել է հենց այս ուղղությամբ: Հիմա էլ կրկին Ադրբեջանի կողմից ստացած առաջարկությունները վկայում են նույն խնդրի մասին: Չէի ասի, որ ղարաբաղյան հասարակությունը լիովին ողջունում էին այս փաստաթուղթը: Բայց կային նաև դրական արձագանքներ, որ եթե անգամ այս փաստաթուղթը բանակցային հարաբերություններում կոնկրետ դրական առաջընթաց չգրանցի, գոնե այն ֆոն կստեղծի»:
Շատերին մտահոգեցին փաստաթղթում ներառված դրույթների գործնականում իրականացման մեխանիզմները, օրինակ՝ հարց հնչեց, թե ինչպես են պատկերացնում ադրբեջանական դասագրքերի՝ հայկական կողմին տրամադրումը և այլն:
Տաթև ՀԱՐՈՒԹՅՈՒՆՅԱՆ
