Հունգարիայում ադրբեջանցի ոճրագործ Ռամիլ Սաֆարովի կողմից կացնահարված Հայաստանի ԶՈՒ սպա Գուրգեն Մարգարյանի հոր՝ ինքնասպանության փորձ կատարած 65-ամյա Արտուշ Մարգարյանի վիճակը համեմատաբար կայունացել է: Այս մասին NEWS.am-ին հայտնել է «Մալաթիա» բ/կ-ի Վերակենդանացման բաժանմունքի ղեկավար Արթուր Հովհաննիսյանը:
Բժշկի խոսքով` Արտուշ Մարգարյանը կարող է ինքնուրույն շնչել, անգամ ջուր կուլ տալ, արհեստական շնչառության ապարատը անջատվել է: Նրա գիտակցությունը սկսել է վերականգնվել, բայց դեռ խոսք հասկանալ, վերարտադրել չի կարող:
«Որպես հետեւանք ծանր շոկային վիճակի նրա մոտ արձանագրվել է իշեմիկ ինսուլտ, ինչի պատճառով էլ գիտակցությունը մասնակի է վերականգնվել, այսինքն` բացել է աչքերը, նայում է, ռեակցիաներ կան, բայց բանական շփում` խոսք հասկանալ, վերարտադրել, վերադարձնել, չի կարող: Շոկը ազդել է արյան շրջանառության վրա, ինչի հետեւանքով ուղեղի թերսնցում է եղել»,- ասել է Արթուր Հովհաննիսյանը:
Բժիշկը նշել է, որ նման բարդություններ լինում են տարբեր շոկային վիճակներից հետո, դրանք արագ չեն շտկվում եւ կարող են վերականգնվել միայն մասամբ
