Մաքսային միությունը չի խանգարի Հայաստան-Իրան հարաբերություններին սեպտեմբերի յոթին «Արմատ» մամուլի ակումբում հայտարարեց քաղաքագետ Սերգեյ Շաքարյանցը: Զրույցի ընթացքում քաղաքագետը մեջբերեց ամերիկյան Գելափ ինստիտուտի անցկացրած հարցումները, ըստ որոնց հարցմանը մասնակցած Հայաստանի բնակչության ութսուն տոկոսից ավելին ուղղված է դեպի Ռուսաստան:
Քաղաքագետը անհիմն է համարում խոսակցությունները, թե Ռուսաստանը ճնշում է Հայաստանին, եւ համոզված է, որ Եվրամիությունը արդեն երեք տարի է, ինչ ճնշում է գործադրում. «Տարբեր մարդիկ սկսել են մեկնաբանել, թե իբր Ռուսաստանը մեզ պատժում է: Ճիշտն ասած, մի քիչ ծիծաղելի է. Ռուսաստանը, ինչպես սեպտեմբերի երեքին պարզվեց, ի վիճակի է պատժել Ամերիկայի միացյալ նահանգներին եւ նրա դաշնակիցներին: Ես միշտ կարծել եմ, երբ որ Ռուսաստանի խելքն ու միտքը զբաղված է Ուկրաինայով, նա ոչ Հայաստան է տեսնում, ոչ Ադրբեջան»:
Սերգեյ Շաքարյանցը նշեց, որ կողմ է Մաքսային միությանը միանալուն, միայն սխալ է համարում նախագահ Սարգսյանի բնակչության կարծիքը հաշվի չառնելը. «Ինքը խաղացող է, պետք է հաշվի նստեր բնակչության կարծիքի հետ, նա ոչ թե ազգի կարծիքն է հաշվի առել, այլ խաղի օրենքները»:
Ամի ՉԻՉԱԿՅԱՆ
