«Հայերենը վտանգված է` անկախ Հայաստանում ռուսալեզու գիմնազիայի բացման հնարավորությունից: Երբ հայախոս մարդկանց հսկայական զանգված է հեռանում մայր հողից, լեզուն ինքնին վտանգվում է» ,- այսօր այս մասին «Արմատ» մամուլի ակումբում անդրադառնալով` Հայաստանում ռուսալեզու գիմնազիայի բացման վերաբերյալ Վ.Պուտինի հայտարարությանը, ասաց լեզվաբան Դավիթ Գյուրջինյանը:
Ըստ նրա`հայերենը արտերկրում դառնում է «խոհանոցային» մակարդակի շփման լեզու, երբ արտասահմանում բնակվող հայերը մայրենի լեզվով բարդ նախադասություններ չեն կարողանում կազմել: «Եթե Հայաստանում ռուսական համալսարան բացվի, այնտեղ սովորող անձինք չեն կարողանա ազատ հաղորդակցվել մայրենի լեզվով: Հայերենի պահպանման գործը պետք է լինի պետական հոգածության առարկա, հայերենի պահպանությունը պետք է մտնի ազգային անվտանգության շրջանակ»,-ասաց նա` առաջարկելով լուծման երկու տարբերակ: Առաջին` պատկան մարմինները հետամուտ լինեն մայրենի լեզվի պահպանմանը, հակառակ պարագայում, հասարակությունն ինքը պահպանի մայրենին` չգնալ եւ չուսանել ռուսական գիմնազիայում կամ համալսարանում: «Միաժամանակ, չպետք է կարծել, որ դեմ եմ ռուսերեն լեզվին, նույնիսկ սիրում եմ այդ լեզուն, սակայն դրա յուրացումը չպետք է լինի հայերենի հաշվին: Հայաստանում անգլախոսության, ֆրանսախոսության կամ գերմանախոսության վտանգ չկա, մինչդեռ վտանգը գալիս է ռուսախոսությունից: Հայաստանում Ամերիկյան համալսարանը անգլախոսություն չի բերել մեր երկիր, մինչդեռ ռուսական գիմնազիան հաստատապես կբերի: Մեր քաղքենի հայրենակիցները, որ փարված են ռուսերեն լեզվին, իրենք են նպաստում ռուսերենի տարածմանը»,-ընդգծեց Գյուրջյանը` նկատելով, որ վտանգը ոչ թե Մոսկվայից է գալիս, այլ հենց մեր ներսից. «Հայախոսների տարածքը գնալով սեղմվում է: Մենք ունենում ենք հայախոսության կորուստ: Մինչդեռ, լեզուն հիմքերի հիմքն է, մարդու հոգեկերտվածքը»,- ասաց լեզվաբանը:
Քրիստինա ՄԻՐԶՈՅԱՆ
Կարդացեք նաև
