Սեպտեմբերի 7-ին «Զարկերակ» մամուլի ակումբում «Հայաստանի սպառողների ասոցացիա» հասարակական կազմակերպության նախագահ Արմեն Պողոսյանը եւ տնտեսագետ Սամվել Ավագյանը քննարկեցին համատարած թանկացումները:
Արմեն Պողոսյանը ներկայացրեց Հայաստանի իրավիճակը. «Այն, որ մեր մոտ ներկրումը եւ արտադրությունը խիստ երկկենտրոնացված է, բոլորս գիտենք, եթե մեկ մարդ ներկրում է ամբողջ շաքարավազի 98%-ը, իսկ մնացած 2% էլի ինքն է ներկրում ուրիշ ազգանունով, ի՞նչ մրցակցության, ի՞նչ տնտեսական օրինաչափությունների մասին կարող է խոսք լինել»:
Իսկ տնտեսագետ Սամվել Ավագյանը նշեց, որ օգոստոսի դրությամբ նկատվում է 9.3% գնաճ, որը վերջին երկու տարիների ամենաբարձր ցուցանիշն է: Ավելի բարձր ցուցանիշ գրանցվել է 2011 մարտին՝ 11.5%. «Կա երեք հիմնական խումբ, որն ամենաշատն է նպաստել գնաճին: Օգոստոսի դրությամբ միրգ ապրանքատեսակում ունենք 25% գնաճ, բանջարեղեն ապրանքատեսակում՝ 32%, իսկ կոմունալ ծառայություններ ապրանքատեսակում՝ 19%: Մենք, եթե հավատանք գյուղնախարարությանը, գյուղատնտեսության լուրջ աճ կա: Միայն բուսաբուծության արտադրության մեջ կա 8% աճ: Եթե բուսաբուծության մեջ կա 8% աճ, ապա մրգերի ու բանջարեղենների գները չեն կարող 20-30% բարձրանալ: Առաջացել է հակասություն՝ կամ էդ վիճակագրությունն է ոչ հիմնավոր, կամ իրենց գների հաշվարկն է ոչ ճիշտ կատարված»:
Ստեղծված իրավիճակի լուծում Արմեն Պողոսյանը առաջ քաշեց քվոտաների գաղափարը, որի արդյունքում մրցակցական դաշտ կառաջանա եւ գները կնվազեն:
Կարդացեք նաև
Ամի ՉԻՉԱԿՅԱՆ
