Սեպտեմբերի վեցին «Ազատագրենք հուշարձանները օլիգարխներից» հասարակական շարժման նախաձեռնող խումբը կազմակերպել էր «Փակ շուկայում» իրականացվող շինարարական գործողությունների դեմ բողոքի երթ: Այն սկսվեց Մշակույթի նախարարությունից և շարժվելով դեպի դատախազություն և քաղաքապետարան ավարտվեց «Փակ շուկայի» դիմաց: Երթի ընթացքում իրենց խոսքը ասեցին ակտիվիստներ Գևորգ Սաֆարյանը և Շողակաթ Վարդանյանը, «Նախախորհրդարանի» անդամ Գարեգին Չուքազյանը, ճարտարապետ Սաշուր Քալաշյանը, Արցախի Ազգային ժողովի պատգամավոր Վահան Մանասյանը և այլոք:
«Ազատագրենք հուշարձանները օլիգարխներից» հասարակական շարժման պահանջներն էին՝ «Ծածկած շուկայի» սեփականատիրոջն օրենքով սահմանված կարգով ենթարկել պատասխանատվության, նրան հարկադրել հատուցել հուշարձանին հասցրած վնասը և վերականգնել դրա նախկին վիճակը, Դադարեցնել հուշարձանի նկատմամբ սեփականատիրոջ օգտագործման իրավունքը և դրա տարածքում արգելել որևէ տնտեսական գործունեություն՝ մինչև նշված օրենքի պահանջների կատարումն ու հուշարձանի նախկին վերականգնումը նշված պայմանները չկատարելու դեպքում իրավական միջոցներով սեփականատիրոջը զրկել սեփականության իրավունքից:
Կարդացեք նաև
Գարեգին Չուքազյանն իր խոսքում նշեց, որ Հայաստանի Հանրապետության ոստիկանությունը բարձրաստիճան ոստիկանների շուրթերով հայտարարում է, որ հանրապետական նշանակության հուշարձանը ընդամենը «բազար» է, որտեղ առևտուր են արել ադրբեջանցիները:
Երևանի քաղաքապետարանի դիմաց գնդապետ Վալերի Օսիպյանը խնդրեց ակտիվիստներին չօգտագործել բարձրախոս և քաղաքապետարանի աշխատանքներին չխանգարել, քանի որ բողոքներ և ահազանգեր են ստացել քաղաքապետարանի աշխատակիցներից: Երթի ընթացքում, հայտարարություններ էին հնչում, որ ապագայում «Փակ շուկայի» «բախտին» կարող են արժանանալ Գառնիի տաճարը և Էջմիածնի Մայր տաճարը:
Ակտիվիստ Շողակաթ Վարդանյանը իր խոսքում հիշեց իր առաջին զգացումները «Փակ շուկան» մտնելուց և այն համեմատեց տաճարի հետ.
«Էդ շենքում հոգևոր մթնոլորտ էր տիրում, բոլորիս համար շուկա ասվածը դա բազարն է, այսինքն՝ կեղտոտ, ինչ-որ այլանդակ բացականչություններով, գետինը թափթփված, բայց ճարտարապետը էս շուկան սարքել էր տաճար, ինքը էնպես էր կառուցել, որ էս շենքը իրենից շատ ավելին էր ներկայացնում, քան պարզապես, վայր, որտեղ մթերք է վաճառվում: Ժողովո՛ւրդ, էս շինության մեջ իմ մանկության մի փոքր մասնիկն ա, որը խլում են ինձնից, իսկ ես թույլ չեմ տա, որ իմ սիրած կառույցը ինձնից խլեն»:
«Փակ շուկայի» դիմացի փողոցին կանգնած ակտիվիստները կոչ արեցին դիմացի մայթում շուկայի պատգամավոր, գործարար Սամվել Ալեքսանյանին պաշտպանող քաղաքացիներին գնալ բանակցությունների:
Ամի ՉԻՉԱԿՅԱՆ
