Այսօր՝ սեպտեմբերի վեցին, տեղի ունեցավ «Հեղինակային իրավունքի հիմնախնդիրները առցանց ԶԼՄ-ներում. օրենք եւ ինքնակարգավորում» խորագրով համաժողով, որը կազմակերպվել էր «Լրագրողներ հանուն ապագայի» հ/կ կողմից` ԵԱՀԿ երեւանյան գրասենյակի աջակցությամբ:
Միջոցառման քննարկվող թեմաներն էին՝ հեղինակային իրավունքի պաշտպանության ինքնակարգավորման մեխանիզմները առցանց ԶԼՄ-ներում, ինչպես նաեւ՝ «Հեղինակային իրավունքի եւ հարակից իրավունքների մասին» Հայաստանի Հանրապետության օրենքում լրացումներ կատարելու մասին» Հայաստանի Հանրապետության օրենքի նախագիծը: Համաժողովին ներկա էր նաեւ օրենքի համահեղինակներից մեկը՝ ԱԺ ՀՀԿ պատգամավոր Արփինե Հովհաննիսյանը:
ԵԱՀԿ երևանյան գրասենյակի ժողովրդավարացման ծրագրի ղեկավար Օլիվեր ՄակՔոյը իր խոսքում նշեց, որ կարեւոր է, որ հասարակության երկու սեկտորները՝ լրագրողները եւ օրենսդիրը միավորվել են այսքան կարեւոր հարցի քննարկման շուրջ:
«Լրագրողներ հանուն ապագայի» հ/կ-ի նախագահ Սուրեն Դեհերյանն էլ նշեց, որ հատկապես 2013 թվականին հեղինակային իրավունքի պահպանման եւ գրագողության դեմ պայքարին ուղղված քննարկումներն ավելի ակտիվ բնույթ էին կրում: Նա հիշեցրեց, որ արդեն վեցերորդ տարին է՝ իրենց կազմակերպությունը տարբեր ձեւերով փորձում է լրատվամիջոցների ներկայացուցիչներին սովորեցնել, թե ինչպես կիրառել այլընտրանքային մեդիագործիքները. կազմակերպվել են սեմինարներ, կատարվել է առցանց լրատվամիջոցների մշտադիտարկում, եղել է առաջարկների փաթեթի մշակում եւ վերջերս արված քայլը առցանց լրագրողի ուղեցույցի պատրաստումն է:
Կարդացեք նաև
Պարոն Դեհերյանը կարծիք հայտնեց, որ գուցե շուտով առցանց մեդիան փոխարինելու գա ավանդականին. «Եթե ավանդական մեդիան տեղափոխվում է առցանց, ուրեմն տպագիր տարբերակների գոյությունը չի արդարացվի: Մենք պետք է հասկանանք, որ այն միջավայրը, որտեղ վաղը մարդ պետք է արտահայտվելու հնարավորություն ունենա եւ ինֆորմացիա ստանա, պետք է վստահելի ու անվտանգ լինի: Դրա համար պետք է որոշակի քայլեր ձեռնարկվեն»,- ասաց նա:
ԱԺ ՀՀԿ պատգամավոր Արփինե Հովհաննիսյանն իր խոսքում նշեց, որ երբ լրատվամիջոցների կողմից բարձրաձայնվեցին գրագողության հետ կապված խնդիրները, նա զարմացավ. «Իմ առաջին արձագանքը հետեւյալն էր. բայց դուք ունեք մեխանիզմը, ինչի՞ չեք պայքարում»:
Արփինե Հովհաննիսյանը անկեղծացավ՝ օրենքն ամբողջությամբ նոր չէ, այլ որոշակի սահմանումների պարզաբանում եւ հստակեցում է՝ լրատվամիջոցների իրավունքները պաշտպանելու համար: «Անկեղծ ասած, ես հեռու եմ այն մտքից, որ այս նախագծով կլուծվեն գրագողությանը վերաբերող բոլոր տեսակի խնդիրները կամ ավելին ասեմ՝ չի լուծվի առկա խնդիրների ճնշող մեծամասնությունը, բայց սա մեկ քայլ առաջ է եւ հենց այն պատճառով, որ լրատվական կայքերի ճնշող մեծամասնությունը դրան համաձայն են»,- ասաց նա:
Օրենքի մշակման համահեղինակը մատնանշեց, որ տիրող իրավիճակը կարող է շտկվել միայն այն դեպքում, երբ լրատվամիջոցների ղեկավարները հեղինակային իրավունքի խախտման դեմ պայքարեն դատավարական ընթացակարգով, լինի դատական պրակտիկա եւ ունենանք նախադեպեր:
ԱԺ պատգամավորը նշեց, որ օրենքի նախագծի քննարկումը կլինի սեպտեմբերի 9-12-ի քառօրյայում:
Հռիփսիմե ՀՈՎՀԱՆՆԻՍՅԱՆ
