Այսօր Aravot.am-ը ՀԱԿ խմբակցության ղեկավար Լեւոն Զուրաբյանից հետաքրքրվեց՝ կարո՞ղ ենք ասել, որ ԵՄ-ն արդեն Հայաստանի նկատմամբ պատժամիջոցներ է կիրառում՝ Մաքսային միություն մտնելու հայտարարության համար: Նա պատասխանեց. «Ես կարծում եմ, որ նման պարզունակ մոտեցումներ չպիտի լինեն: Հիմա ամեն մի հայտարարություն, մի քիչ կոշտություն կամ մի քիչ փափկություն գնահատում են որպես արձագանք՝ Արեւմուտքի կողմից: Դա այդքան պարզունակ չի: Կարող է զուգադիպել է: Ես չեմ կարծում, որ հիմա ամեն մի հայտարարություն պետք է մեկնաբանել՝ որպես Արեւմուտքի վերջնական ռեակցիա:
Արեւմուտքն էլ դիվանագիտություն գիտի անել: Եթե անգամ շատ ջղայնացած լինի Սերժ Սարգսյանի այս որոշման վրա, նաեւ հասկանում է, որ դա չի նշանակում, որ Հայաստանի հետ պետք է խզել կապերը: Նա հասկանում է, որ միեւնույն է, պետք է շարունակի ինչ-որ հարաբերություններ, ինչ-որ երկխոսություն՝ Հայաստանի հետ: Մի հայտարարություն ավելի կոշտ էր, մյուսն ավելի փափուկ էր, այսինքն, նորմալ դիվանագիտական պրոցես է:
Բայց, ընդհանուր առմամբ բնական է, որ արեւմտյան բազմաթիվ երկրների քաղաքական վերնախավը, որը Հայաստանից շատ մեծ ակնկալիքներ ուներ այս առումով, գտնվում է շատ հիասթափված վիճակում: Ինչ-որ իմաստով, կներեք, իրենց հասնում է, որովհետեւ, եթե նրանք, հակառակ մեր բոլոր պնդումներին, մեր բոլոր տեղեկություններին հավատացել են, որ այդ մարդուն կարելի է վստահել, ուրեմն՝ մեղքը իրենց վիզը»:
Մեր հարցին՝ ինչո՞ւ առաջ եվրոպական կառույցները բացառում էին «եւ-եւ» տարբերակը, իսկ հիմա ասում են, որ մի համաձայնագիրը մյուս պայմանագրին չի հակասում՝ Լեւոն Զուրաբյանը պատասխանեց. «Եթե մենք փորձենք դատել նրանց հայտարարություններով՝ հակասական պատկեր է ստեղծվում, որովհետեւ մեկ Շվեդիայի արտգործնախարարը գրում էր, որ 180 աստիճանի շրջադարձ եղավ, մեկը ավելի փափուկ հայտարարություն է անում: Չի կարելի այս հայտարարությունների հիման վրա, առավել եւս, որ դրանք փոխադարձ հակասության մեջ են գտնվում, չի կարելի դրանց հիման վրա դատել: Սա մի քիչ ավելի բարդ դիվանագիտական պրոցես է, որին պետք է հետեւել եւ կամաց-կամաց հասկանալ, թե ինչ գիծ է ձեւավորվում:
Կարդացեք նաև
Եթե ուզում եք ճիշտը, իրենք էլ չգիտեն, թե ինչ ռեակցիա տան: Ասենք, հիասթափված են, եւ ի՞նչ: Այդ հիասթափությունը քաղաքական կատեգորիա չի: Հիասթափությունը պետք է հետո թարգմանվի ու դառնա քաղաքական դիրքորոշում: Այ, երբ թարգմանվում է, ավելի փափուկ ձեւակերպումներ են գտնվում, բայց ընդհանուր գործընթացը մեզ բոլորիս համար հասկանալի էր: Հասկանալի է, որ սա մեծ հիասթափություն է՝ ԵՄ-ի համար: Բայց չենք կարող մեղադրել ոչ ԵՄ-ին, ոչ ՌԴ-ին, միակ մեղավորը Սերժ Սարգսյանն է: Եթե ԵՄ-ին ինչ-որ բանի մեջ կարելի է մեղադրել, միայն այն բանի մեջ, որ իրենք հավատացել են Սերժ Սարգսյանի նման մարդուն»:
Հռիփսիմե ՋԵԲԵՋՅԱՆ
