«Արդար չէ դեռ չսկսած գործընթացների նկատմամբ արդեն ասել, որ ակնկալիքներ չունենք: Թող լինի խորհրդակցություն, իրենց առաջարկները ներկայացնեն այն ժամկետներում, որ իրենց համար ճշտել են, այդ ժամանակ էլ կտեսնենք` առաջարկները իսկապես փոփոխություն կբերե՞ն, թե՞ ոչ: Ուստի գործընթացը չսկսած այն արդեն տապալված համարելը ճիշտ չէ»,-Aravot.am-ի հարցին` լուրջ ակնկալիքներ ունե՞ն ՀՀ նախագահի հրամանագրով ստեղծված սահմանադրական բարեփոխումների հանձնաժողովի աշխատանքից, այսպես պատասխանեց ՀՅԴ բյուրոյի Հայ դատի եւ քաղաքական հարցերի գրասենյակի ներկայացուցիչ Կիրո Մանոյանը:
Մեր հարցին` այն փաստը, որ հանձնաժողովում ընդգրկված չեն ընդդիմության ներկայացուցիչներ, չնայած ժամանակին սահմանադրական բարեփոխումներ իրականացնելու խնդիրը բարձրացվել էր հենց ընդդիմության կողմից, արդյոք ինչ-որ բանի մասին չի՞ խոսում, Կիրո Մանոյանն այսպես արձագանքեց. «Դա ինչ-որ բանի մասին խոսում է : Նաև այն առարկությունը, որ հանձնաժողովի անդամներից մեկը արել է այս հարցի կապակցությամբ, դա էլ է զարմանալի: Փոխանակ հանձնաժողովի անդամներին նշանակողը, կամ նրա խոսնակը բացատրի, թե հանձնաժողովում ինչու ընդդիմությունից մարդ չկա, հանձնաժողովի անդամն է բացատրություն տալիս: Բայց անգամ այս հանգամանքը հաշվի առնելով` ճիշտ չէ ասել, որ գործընթացը տապալված է: Թող քննարկեն, քանի որ ընդդիմությունն էլ ասելիք ունի»:
Տաթև ՀԱՐՈՒԹՅՈՒՆՅԱՆ
Կարդացեք նաև
