Այսօր Ամասիայում փոխվարչապետ Արմեն Գևորգյանի ու ՊԵԿ- նախագահ Գագիկ Խաչատրյանի մասնակցությամբ կտրվեց արվեստների 50-ամյա դպրոցի շենքի ժապավենը, որի վերանորոգմանն ու կահավորմանը, բացի «Յու Քոմ» ընկերությունից, մասնակցել էր նաև ՊԵԿ նախագահի գլխավորած «Ամասիայի զարգացման հիմնադրամը»:
Հիշեցնենք, որ ՊԵԿ նախագահը ծննդով Ամասիայից է , նա 4 տարի առաջ հիմնադրամ է ստեղծել հանրապետությունում հայտնի մի շարք պաշտոնավոր ու գործարար ամասիացիների հետ:
Ինչպես Aravot.am-ին տեղեկացրեց Ամասիայի վերջերս ՀՀԿ-ական դարձած գյուղապետ Աղասի Ամիրյանը՝ այն բանկի կիսակառույց շենք է եղել, հանրապետության նախագահը, վերջին անգամ այցելելով Ամասիա, հանձնարարական է տվել այն վերցնել համայնքի հաշվեկշռին: Գյուղապետարանն էլ դատարան է դիմել, շենքը տիրազուրկ է ճանաչվել, այն հանձնվել է գյուղապետարանին, որտեղ և տեղափոխել են արվեստի դպրոցը:
Թե ինչքա՞ն գումար է ծախսվել վերանորոգման համար, գյուղապետը չկարողացավ պատասխանել` պատճառաբանելով, որ այն բարեգործություն է: «Ինչի՞ որ մենք գյուղական վայր ենք, լավ պայմաններով եվրաոճի դպրոցի արժանի չե՞նք »,- ասաց գյուղապետը:
Կարդացեք նաև
Նա թվարկեց ՊԵԿ նախագահի գլխավորած հիմնադրամի աշխատանքները` նշելով, որ մանկապարտեզի ծախսերը ամբողջապես ֆինանսավորում է այդ հիմնադրամը, համայնքապետարանից այս նպատակի համար կես լումա անգամ չի ծախսվում, 17 հոգի էլ աշխատող են պահում: Ավելին, ըստ գյուղապետի, այստեղ որ գյուղացին դուռը բացել է, ձրի գազ են ներս տարել:
Aravot.am-ը գյուղապետից հետաքրքրվեց, թե ՊԵԿ նախագահն, որն այդպես լավ է նայում իր ծննդավայրին, ինչո՞ւ չի կարողանում կանխել Ամասիայի դատարկումը: «Արտագաղթը անցյալում է, վերջին երկու տարում մենք արտագաղթ չունենք, մեր մանկապարտեզի երեխաներն են շատանում և դպրոցի առաջին դասարանցիները: Եթե վերջին 5 տարում դուք նայեք թվերը, կտեսնենք, որ առաջին դասարանցիների քանակը տարեցտարի ավելանում է, վերջին 5 տարիների ընթացքում ծնունդների ու մահերի հարաբերակցությունը ևս անհամեմատելի է, ծնելիության թիվը ավելանում է», -ասաց գյուղապետը:
Մենք հետաքրքրվեցինք, թե Ամասիայում ե՞րբ է եղել վերջին հարսանիքը կամ առհասարակ հարսանիքներ լինո՞ւմ են: «Չեմ հիշում, բայց մասնակցել եմ մի քանի օր առաջ, մեր լավ ընկերոջ տղայի հարսանիքն էր»,- ասաց գյուղապետը:
Այս պաշտոնյայից մի քանի մետր հեռավորության վրա կանգնած ամասիացի նախկին մի պաշտոնյա` Հրանտ Գրիգորյանը, մեզ հետ զրույցում դժգոհեց, որ մոտավորապես 40 տոկոսը արտագաղթում են: Մեր այն դիտարկմանը` բա Ձեր գյուղապետը ասում է վերջին երկու տարում նման բան չկա, ծերունին անկեղծորեն զայրացավ. «Սուտ է ասում, հերիք չեղա՞վ ստի վրա պետություն կառուցեք, տեսնում եք չի կառուցվում էլի»:
Կողքից միջամտեց մեկ այլ ծերունի` տեղեկացնելով, որ Ամասիայի երիտասարդությունը լրիվ դրսում է:
Ամասիացիների հետ զրույցը կներկայացնենք քիչ անց:
Նունե ԱՐԵՎՇԱՏՅԱՆ
