Այսօր «Մեդիա կենտրոնում» Տարածաշրջանային հետազոտությունների կենտրոնի տնօրեն Ռիչարդ Գիրագոսյանն անդրադառնալով Մաքսային միությանը Հայաստանի անդամակցելու գործընթացին ու դրա հետեւանքներին՝ ասաց. «ՀՀ նախագահը անակնկալ կերպով հայտարարեց, որ Հայաստանը ցանկանում է միանալ Մաքսային միությանը՝ դրանով վերջ դնելով խորը եւ համապարփակ ազատ առեւտրի համաձայնագրին միանալու հնարավորությանը: Խնդիրը որոշումների կայացման գործընթացին է վերաբերում եւ նրան, թե ինչպես այդ որոշումը հրապարակվեց: Չկար որոշակի հանրային քննարկում ու հաշվի չառնվեց հանրային կարծիքը»:
Գիրագոսյանի խոսքով, եթե ճիշտ է այն տեսակետը, որ Հայաստանը Ռուսաստանի կողմից ճնշման տակ է, ապա սա վկայել է տվել, որ հայ-ռուսական հարաբերություններում առկա է լուրջ սխալ ու դա վիրավորանք է Հայաստանի նկատմամբ. «Իսկ եթե, ինչպես ՀՀ նախագահը հայտնեց, Հայաստանի վրա ճնշում չի գործադրվել, ապա դա ցույց է տալիս Հայաստանի քաղաքականության թուլությունը, ինչպես նաեւ այն, որ ՀՀ նախագահը շատ արագ եւ առանց որոշակի քննարկման՝ զիջեց Ռուսաստանին»:
Գիրագոսյանը գտնում է, որ Արեւմուտքը եւ ԵՄ-ն այսուհետեւ Հայաստանին այլ աչքով կնայեն, քանի որ այս որոշումը թուլացնում է ՀՀ ռազմավարական կարեւորությունը` «Որոշման ընդունման գործընթացն ու դրա հրապարակայնացման ձեւը 2-րդ խնդիրն է առաջ բերում Հայաստանի համար. Հայաստանը դիտվում է որպես ոչ անկեղծ, ոչ մրցակցային, եւ ավելի թույլ պետություն: Սա հատկապես շատ խայտառակ պահ էր ՀՀ վարչապետի համար: Դա վտանգի տակ է դնում նաեւ Հայաստանում երկարաժամկետ բարեփոխումների գործընթացը: Մաքսային միությունը Հայաստանին տնտեսական օգուտների առումով շատ բան չի առաջարկում: Երկու ակնհայտ օգուտ ստացող կողմերը կլինեն օլիգարխական համակարգը եւ կոռուպցիան: Մոսկվայի ոճի ճնշումները տեղ կգտնեն եւ կմերժեն ԵՄ-ի կողմից առաջարկվող մեծ օգուտները եւ Հայաստանի մուտքը մեծ շուկա»,- նշեց Գիրագոսյանը:
Նա նաեւ հույս հայտնեց, որ ժամանակ ունենք ուղղելու այս լուրջ սխալը. «ՀՀ նախագահը որեւէ փաստաթուղթ չի ստորագրել Մոսկվայում: Դեռ ժամանակ կա՝ իրականացնելու մեր ցանկությունները եւ ընդառաջ գնալու այս հնարավորությանը Վիլնյուսի գագաթնաժողովից առաջ»:
Կարդացեք նաև
Գիրագոսյանը հավելեց, որ Հայաստանը Ռուսաստանի միակ վստահելի գործընկերն է տարածաշրջանում: Հայաստանը ՀԱՊԿ-ի անդամ է, տարածաշրջանում միակ երկիրն է, որն ընդունում է ռուսական ռազմաբազաները ու այդ դեպքում ինչո՞ւ պետք է Հայաստանը ցուցաբերի իր վստահությունը Ռուսաստանի նկատմամբ, երբ իրականում հակառակը պետք է լինի`«Մոսկվայի կողմից այս վստահությունը գնահատելու միակ դրսեւորումը եղել է Ադրբեջանի ռազմական մատակարարը դառնալը: Ռուսական զենքերը գործածվում են ՀՀ եւ ԼՂ զինվորներին սպանելու համար: Իսկ ԵՄ-ն Ասոցացման համաձայնագրով եւ Խորը, համապարփակ, ազատ առեւտրի պայմանագրով չի առաջարկել ռազմական համագործակցություն: Այս երկու համաձայնագրերից ոչ մեկը սպառնալիք չէ հայ-ռուսական ռազմական հարաբերություններին»,- ավելացրեց նա:
Եվա ՀԱԿՈԲՅԱՆ
