«Ազատություն» ռադիոկայան. Հայաստանը որպես կռվախնձոր դիտարկող ուժերը չեն կարող երկարաժամկետ գործընկեր լինել, ընդգծում է Հանրապետականի փոխնախագահը:
Հինգշաբթի օրը Բրյուսելում Եվրոպական ժողովրդական կուսակցության (ԵԺԿ) քաղաքական վեհաժողովի ժամանակ հրատապ բանաձևի նախագիծ է ընդունվել, որում ԵԺԿ-ն դատապարտում է Ռուսաստանի կողմից Հայաստանի հանդեպ կիրառված ճնշումը և ափսոսանք է հայտնում այդ հանգամանքներում Հայաստանի նախագահի կայացրած որոշման կապակցությամբ, որը վտանգում է Հայաստանի ձեռքբերումները Եվրամիության ուղղությամբ:
Հայաստանի Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը և կրթության և գիտության նախարար, Հանրապետական կուսակցության փոխնախագահ Արմեն Աշոտյանը, ովքեր վեհաժողովին ներկայացրել են Հանրապետական կուսակցությունը, ստիպված են եղել ԵԺԿ-ի եվրոպացի գործընկերներին բացատրել, թե ինչպես Հայաստանը տարիներ շարունակ Եվրամիության հետ բանակցելով հանկարծակի որոշեց միանալ Ռուսաստանի նախաձեռնած Մաքսային միությանը:
«Իհարկե, եվրոպական հանրության մոտ նման տեսակի հայտարարությունը չէր կարող միանշանակ ռեակցիա առաջացնել, և ռեակցիաները բավականին տարբեր են՝ սկսած այն հանգամանքից, որ Հայաստանը մեղք չունի՝ Հայաստանի վրա ճնշումներ են գործադրվել իբր թե, վերջացրած այն տեսակետով, որ այս խնդիրը միայն Հայաստանով չի սահմանափակվում, այլ ընդհանուր աշխարհաքաղաքական վեճ է գնում», – «Ազատություն» ռադիոկայանի հետ զրույցում ասաց Արմեն Աշոտյանը:
Կարդացեք նաև
Բրյուսելում ԵԺԿ-ի վեհաժողովի առաջին օրվա նիստից հետո «Ազատություն» ռադիոկայանի հետ զրույցում Հայաստանի իշխող կուսակցության ներկայացուցիչները փոխանցեցին, թե եվրոպացիներից շատերն ըմբռնումով են մոտեցել:
«Բնականաբար, դա առաջին հերթին պայմանավորված է անվտանգության խնդիրներով, իսկ սա առավել քան հասկանալի է քաղաքական շրջանակներում», – ընդգծեց Արտակ Զաքարյանը:
«Հայաստանի շահով են բացատրվում որպես ընտրություն: Հայաստանին երբեք այս տարիների ընթացքում, եթե բարձրացնեք մամուլը՝ բացի վերջին վեց-ութ ամիսների, որևէ մի աշխարհքաղաքական ուժ՝ ո՛չ Ռուսաստանը, ո՛չ Եվրամիությունը, չի ասել, չի ակնարկել, չի խոսել «կա՛մ-կա՛մ» ընտրության մասին: Խաղի կանոնները փոխել խաղի վերջում՝ այդքան էլ ազնիվ մոտեցում չէ գործընկերների նկատմամբ», – ասաց Արմեն Աշոտյանը:
Նա հավելեց, որ Հայաստանը որպես կռվախնձոր դիտարկող ուժերը չեն կարող երկարաժամկետ գործընկեր լինել, իսկ այ Հայաստանին միջազգային իրավունքի սուբյեկտ համարող ուժերի հետ Հայաստանը պատրաստ է ճանապարհ անցնել:
Հայաստանը, միանալով Մաքսային միությանը, առաջնորդվում է առաջին հերթին անվտանգության և էներգետիկ շահերով` ասում են հանրապետականները, դեռ չունենալով այն հարցի պատասխանը, թե Մաքսային միության անդամակցության գլխավոր նախապայմանին չհամապատասխանելը, այն է` Ռուսաստանի հետ սահման չունենալը, ինչպես է կարգավորվելու:
«Գիտեք, դրանք բոլորը խնդիրներ են, որոնք Մաքսային միությանն անդամակցելու գործընթացում, անպայման, ունենալու են լուծումներ: Նախապայման՝ դա չի նշանակում, որ պետք է անպայման սահման ստեղծենք: Խնդիրը հետևյալն է, որ գոյություն ունեն համապատասխան համաձայնագրեր, որոնք որ կարգավորում են մաքսային խնդիրները, մաքսային հարաբերությունները, և, բնականաբար, այդ ամբողջը իրավական բազայի վրա պետք է կառուցված լինի», – նշեց Արտակ Զաքարյանը:
Արմեն Աշոտյանն էլ ասում է` Հայաստանը շարունակելու է Եվրոպայի հետ համագործակցությունը, փորձելու է օգտագործել եվրոպական շուկան, երկկողմ հարաբերությունները պահպանել:
«Ազատություն» ռադիոկայանի այն նկատառմանը, թե Մաքսային միություն մտնելով՝ Հայաստանը զրկվում է այդ միությունից դուրս ինքնուրույն տնտեսական հարաբերություններ վարելու հնարավորությունից, Աշոտյանը արձագանքեց. – «Դոգմատիկ փաստաթղթեր չկան, անգամ սահմանադրություններ են փոխվում երկրների, Հայաստանի դեպքում՝ տասը տարին մեկ»:
Ընդդիմադիր «Ժառանգություն» կուսակցության դիրքորոշումը ԵԺԿ-ի վեհաժողովում ներկայացրել է Ստյոպա Սաֆարյանը, ով «Ազատություն» ռադիոկայանի հետ զրույցում ասաց, թե վեհաժողովն ընդգծել է, որ եվրասիական Մաքսային միության անդամակցությունը անհամատեղելի է Ասոցացման համաձայնագրի, ներառյալ՝ Խորը և համապարփակ առևտրի գոտու համաձայնագրի կնքման հետ:
Էլինա Չիլինգարյան
