Երևանի քաղաքապետարանի 2013 թվականի շինբարեկարգման ծրագրով նախատեսված են թվով 25 կամուրջների, ուղետարների և ուղեանցների սպասարկման ու ընթացիկ նորոգման աշխատանքներ: Գործընթացն իրականացնում է մրցութային կարգով ընտրված «Կամուրջշին» ընկերությունը:
Գարնանից մեկնարկած ծրագրի նպատակը կամուրջներն ու կամրջային կառուցվածքները մշտապես աշխատանքային վիճակում պահելն ու նաև քաղաքային միջավայում դրանց անհրաժեշտ գեղագիտական տեսքը ապահովելն է: Կամուրջների վրա այս կամ այն տեսակի աշխատանքի իրականացումն ի հայտ է գալիս մասնագիտական ուսումնասիրության արդյունքում: Հիմնականում կարգաբերվում են երթևեկելի գոտիները, վերասվաղվում են պատերի ու առաստաղի հատվածաբար թափված ծեփոնները, փոխվում են եզրաքարերը և այլն: Առանձին աշխատանքներ, ծանրաբեռնված երթևեկությամբ պայմանավորված, իրականացվում են գիշերային ժամերին:
Այժմ «Կամուրջշինի» մասնագետները ներկում ու պատշաճ տեսքի են են բերում Դավթաշենի կամրջի մետաղական կրող կոնստրուկցիաները: 2013թ. մայրաքաղաքի կամուրջների սպասարկման և ընթացիկ նորոգման համար նախատեսվել է 90 միլիոն դրամ:
Երևանի քաղաքապետարանի տեղեկատվության և հասարակայնության հետ կապերի վարչություն
