«Ազատություն» ռադիոկայան. Ամերիկայի Հայ դատի հանձնախումբը ԱՄՆ-ի Կոնգրեսում շրջանառության մեջ դրել է նամակ, որտեղ արտահայտվում է ամերիկահայ համայնքի խորը մտահոգությունը Սիրիայի հայկական բնակչության ճակատագրով
Ամերիկայի Հայ դատի հանձնախումբը ԱՄՆ-ի Կոնգրեսում շրջանառության մեջ դրել է նամակ, որտեղ արտահայտվում է ամերիկահայ համայնքի խորը մտահոգությունը Սիրիայի հայկական բնակչության ճակատագրով և Սիրիայի բոլոր քաղաքացիների բարեկեցությամբ: Նամակը ԱՄՆ-ի օրենսդիրներին կոչ է դեմ հանդես գալ ԱՄՆ-ի կողմից Սիրիային հարվածներ հասցնելու որոշման:
«Այն ժամանակ, երբ մեր երկրի ընտրված ներկայացուցիչներն այս շաբաթ կհավաքվեն՝ քննարկելու համար Սիրիայում գտնվող թիրախների դեմ ԱՄՆ-ի հնարավոր գործողությունները, մենք, որպես ամերիկահայեր, ցանկանում ենք մեր ձայնը միացնել մեր այն համաքաղաքացիների ձայներին, որոնք ընդդիմանում են ամերիկյան ռազմական հարվածներին և բռնության ահագնացմանը» – ասված է հաղորդագրության մեջ:
«Նման ահագնացումը, ամենայն հավանականությամբ, հետագա մարտահրավերներ կստեղծի և լրացուցիչ լուրջ վնաս կպատճառի քրիստոնյա համայնքներին, այդ թվում՝ Սիրիայի հայ փոքրամասնությանը», – ասված է ամերիկացի կոնգրեսականներին Ամերիկայի Հայ դատի հանձնախմբի ատենապետ Քեն Խաչիկյանի հղած նամակում:
Կարդացեք նաև
«Արդեն իսկ անչափ շատ արյուն է հեղվել, եղել են անչափ շատ վայրագություններ և անչափ շատ տառապանք: Ագրեսիայի ահագնացումը ո՛չ կյանքեր կփրկի, ո՛չ կնպաստի խաղաղության հաստատմանը», – ասված է Հայ դատի հանձնախմբի հայտարարության մեջ:
Նույն նամակում Խաչիկյանը նշել է, որ ամերիկահայերին շարունակում է անհանգստացնել այն հարցը, որ «չնայած հարյուր միլիոնավոր դոլար կազմող գումարների հասնող ծախսերի, լուրջ տարբերություն է մնում ԱՄՆ-ի կողմից տրամադրվող և մարդասիրական այն օգնության միջև, որն իրականում հասնում է Հալեպում և ամբողջ Սիրիայում բնակվող՝ վտանգի տակ գտնվող հայկական և այլ փոքրամասնություններին»:
Արմեն Հովհաննիսյան
