Այսօր «Մեդիա կենտրոնում» «Աշխարհաքաղաքական նոր ճգնաժամ. Սիրիան ներքին եւ արտաքին սպառնալիքների տակ» թեմայով քննարկմանը մասնակցում էին Սիրիայում ՀՀ նախկին դեսպան, արեւելագետ, պրոֆեսոր Դավիթ Հովհաննիսյանը, Հայոց ցեղասպանության թանգարան-ինստիտուտի փոխտնօրեն Սուրեն Մանուկյանը, քաղաքական գիտությունների թեկնածու, իրանագետ Սեւակ Սարուխանյանը եւ «Սիվիլնեթի» լրագրող Հարութ Էքմանյանը:
Հովհաննիսյանն իր խոսքում նշեց, որ ազատ բանակը որեւէ շանս չունի, քանի որ նախ քանակապես շատ ավելի թույլ է ու բաղկացած հիմնականում դասալիքներից՝ սիրիական բանակից տեղափոխված, իսկ հակառակորդները մարզված են, եւ շատ լավ զինված. «Եթե հանկարծ մուսուլմանական ծայրահեղական շարժումը գա իշխանության, ալավիներին ու բոլոր այլադավաններին կմորթեն»,- ասաց Հովհաննիսյանը, ըստ որի՝ Սիրիայի իշխանությունները իմաստ չէին տեսնի քիմիական զենքի կիրառման, լավ հասկանալով, որ դա իրենց է վտանգելու: «Դա ձեռնտու է մի շարք ուժերի: Ներկայումս ամենաշահագրգռված ուժերը տարածաշրջանային երկրներն են, որոնք պետք է նման մի գործողություն կատարեին, որպեսզի իրավիճակը, որը թեքվում է հօգուտ կառավարական ուժերի, բերեին բալանսի կամ՝ թեքեին զինյալների օգտին»:
Հովհաննիսյանը կարծում է, որ ԱՄՆ նախագահ Բարաք Օբաման փորձում է ամեն ինչ անել, որ ստիպված չլինի հարվածել Սիրիային, քանի որ դա շատ վտանգավոր է. «ԱՄՆ բնակչության 67 տոկոսը դեմ է ցանկացած տիպի հարվածի: Այս բնակչությանը համոզելն անհնար է, քանի որ թարմ են հիշողությունները Իրաքի մասին»:
Հովհաննիսյանի համոզմամբ՝ Սիրիայում իշխող վարչակարգը մեղմ ավտորիտար ռեժիմ է, ինչի շնորհիվ բազմաէթնիկ սիրիական հասարակությունը տասնամյակներ շարունակ ներդաշնակ ապրում էր, զուսպ կոնֆլիկտներով՝ «Այս բալանսը քանդելը նույն ռադիկալ իսլամիստական ծրագրերն են: Ժողովրդավարության մասին խոսել այս պայմաններում չափազանց բարդ է, մանավանդ, երբ այսքան շիկացած են հարաբերությունները»
Սարուխանյանն էլ գտնում է, որ հարվածների դեպքում պատերազմը չի կարող արագ ավարտ ունենալ: Հարվածները բերելու են Ասադի տարածաշրջանային կողմնակիցների ակտիվացման: «Իրանի կողմից ենթադրվում է ավելի մեծ ակտիվացում: Ասադի բանակը կհամալրվի էլ ավելի շատ իրանցիներով:
Ռեժիմի փոփոխությունը Սիրիայում նոր իրավիճակ է նաեւ Լիբանանի համար»,- ասաց Սարուխանյանը, նշելով, որ աշնանը պատերազմը չի ավարտվի:
Մանուկյանն էլ գտնում է, որ վերջապես արտաքին ուժերը խառնվեցին եւ խառնվեցին բացահայտ, ոչ թե քողարկված՝ ուրիշ ուժերի ձեռքով: Նա նաեւ գտնում է՝«Հարվածելու են զորանոցներին, օդանավակայաններին, բոլոր այն տեղերում, որտեղ կենտրոնացված է ռազմամթերք: Եթե ռմբակոծելու են այն հրապարակներին, որտեղից թռչում է սիրիական օդուժը, ապա գոնե այդ մի վճռական առավելությունից Սիրիայի իշխանությունները կզրկվեն»: Մանուկյանը վստահեցրեց, որ եթե Սիրիայում իշխանության գան այն ուժերը, որոնց հովանավորում է Սաուդյան Արաբիան, Սիրիայի վերականգնման հարցը կլուծվի. «Կամ ռուսական, չինական փողերով կօգնեն Ասադին վերականգնել, կամ քաթարյան: Անիշխանության շրջան պատերազմից հետո ես չեմ տեսնում»:
Էքմանյանն էլ ավելացրեց, որ ընդդիմադիրների հիմնական գործիքը պոպուլիզմն է: Տեղացի ժողովրդին փորձում են պոպուլիզմով, սակայն՝
«Ի վերջո, իշխանափոխություն պիտի լինի Սիրիայի մեջ, բայց թե ինչ ձեւով՝ անկանխատեսելի է: Սիրիայի հասարակությունը բազմաշերտ ու բարդ հասարակություն է: Սիրտ ուտողը չի կարող ներկայացնել 23 մլն բնակչություն ունեցող Սիրիայի հասարակությանը: Չեն կարծում, որ Ասադը հրաժարվելու է, քանի որ երեկ հայտարարեց, որ պայքարելու են մինչեւ վերջին շունչը»:
Եվա ՀԱԿՈԲՅԱՆ
