Այսօր տեղի է ունեցել ՀՀ կառավարության հերթական նիստը, որը վարել է ՀՀ վարչապետ Տիգրան Սարգսյանը:
Բացելով նիստը, վարչապետը տեղեկացրել է, որ մրցունակության համաշխարհային զեկույցի համաձայն Հայաստանի դիրքը բարելավվել է: Կատարված ուսումնասիրության և զեկույցի այլ ցուցանիշների մասին հանգամանալից տեղեկություն է տվել ՀՀ տնտեսական մրցակցության պաշտպանության պետական հանձնաժողովի նախագահը, որից հետո Տիգրան Սարգսյանը մատնանշել է մեր երկրի այդ ոլորտի առավելություններն ու թերությունները (տե ՛ ս առանձին):
Նպատակը սեյսմիկ ռիսկի նվազեցումն է
ՀՀ կառավարությունը թույլատրել է ՀՀ գիտությունների ազգային ակադեմիայի երկրաբանական գիտությունների ինստիտուտի կողմից ներմուծված ապրանքների նկատմամբ կիրառված «Ժամանակավոր ներմուծում» մաքսային ռեժիմը երկարաձգել մինչև 2016թ. հոկտեմբերի 12-ը: Ինստիտուտը և Թայվանի Սինիկա ակադեմիան 2011թ. հուշագիր են ստորագրել Կովկասի տարածաշրջանում երկրաբանության, սեյսմոլոգիայի, ակտիվ տեկտոնիկայի և հրաբխայնության բնագավառում հետազոտություններ իրականացնելու նպատակով: ՀՀ տարածք է ներմուծվել տեղորոշման 8 հավաքածու: Նշված սարքերն այժմ օգտագործվում են երկրադինամիկական երկարաժամկետ մոնիթորինգ իրականացնելու համար, աշխատանք, որը թույլ կտա առավել համապարփակ տեղեկություն ստանալ երկրակեղևի հատվածների բախման ընթացքում ձևավորվող լեռնագոյացման, մագմատիզմի, երկրակեղևի երկրաբանական կառուցվածքի առանձնահատկությունների վերաբերյալ: Որոշումը համահունչ է տվյալ բնագավառում կառավարության վարած քաղաքականությանը` նվազեցնել և բացառել աղետների հետևանքներից մարդու կյանքին, առողջությանը և ունեցվածքին հասցվող վնասը, նվազեցնել սեյսմիկ ռիսկը:
Հաջորդ որոշմամբ գործադիրը երեք տարով երկարաձգել է «Ախթամար» ՓԲԸ կողմից ներմուծված ապրանքների նկատմամբ կիրառված «Ժամանակավոր ներմուծում» մաքսային ռեժիմի ժամկետը: Ընկերությունը զբոսաշրջության զարգացմանն ուղղված իր ներդրումային ծրագիրը սկսել է 2009 թվականին` ներմուծելով Սևանի թերակզում ճոպանուղի կառուցելու և շահագործելու տեխնիկական միջոցներ: Այժմ ծրագիրը շարունակվում է, ընկերությունը բացի հյուրանոցային բարձրակարգ ծառայություններից մտադիր է բավարարել նաև լեռնադահուկային սպորտի սիրահարների հետաքրքրությունը:
Հիմնադրվում է կենսաթոշակային երաշխիքային ֆոնդի կառավարման հիմնադրամ
Կարդացեք նաև
Կառավարությունն իր որոշմամբ հիմնադրել է կենսաթոշակային երաշխիքային ֆոնդի կառավարման հիմնադրամ, հաստատել դրա կանոնադրությունը: Հիմնադրամը շահույթ ստանալու նպատակ չհետապնդող իրավաբանական անձ է, որի հիմնական նպատակը պարտադիր կենսաթոշակային ֆոնդերի մասնակիցների կողմից կատարված պարտադիր կուտակային վճարների` ճշգրտված տարեկան գնաճով վերադարձելիություն երաշխավորող ֆոնդի կառավարումն է:
Կառավարությունն իր ավելի վաղ ընդունած որոշումներից մեկում կատարել է փոփոխություններ և լրացումներ, որոնք բխում են «Եկամտային հարկի և պարտադիր կուտակային վճարի անձնավորված հաշվառման մասին» ՀՀ օրենքի պահանջից, ինչպես նաև անձնավորված հաշվառման ավտոմատացման ընթացքում առաջացած խնդիրների լուծման անհրաժեշտությունից:
Գնումների մասին ՀՀ օրենսդրությունում առկա խնդիրների լուծման նպատակով կառավարությունը փոփոխել է իր նախկին որոշումներից երեքը: Դրա շնորհիվ հստակեցվել են առկա ռիսկային և երկակի մեկնաբանության տեղիք տվող դրույթներն ու նորմերը, արվել խմբագրական շտկումներ:
Կառավարությունը հավանություն է տվել Հայաստանի Հանրապետության Վերականգնման վարկերի բանկի միջև լրացուցիչ ֆինանսավորման համաձայնագրի («IWRM/Ախուրյան գետ» ծրագրով մատուցվելիք փորձագիտական ծառայություններ իրականացնելու նպատակով 550 հազար եվրո գումարի չափով դրամաշնորհ») նախագծին:
Նկատի առնելով, որ «Երևանջուր» ՓԲԸ-ն չի օգտագործում ՀՀ տարածքային կառավարման նախարարության ջրային տնտեսության պետական կոմիտեին սեփականության իրավունքով պատկանող 3 հազար 863 գծամետր երկարությամբ Արարատյան առաջին հերթի խողովակաշարի մի մասը, գործադիրը որոշել է այն օտարել մրցութային կարգով:
Փոփոխություններ կատարելով իր ավելի վաղ ընդունած մի քանի որոշումներում, կառավարությունը մարզերում իրագործված ծրագրերից տնտեսված միջոցներն ուղղել է համայնքներում առաջնահերթ լուծում պահանջող հիմնախնդիրների իրականացմանը:
ՀՀ կառավարությունը համաձայնել է Գեղարքունիքի մարզի Նորատուս գյուղի վարչական տարածքում գտնվող, պետական սեփականություն համարվող «Ռադիո» ՓԲԸ բաժնետոմսերի ուղղակի վաճառքի արդյունքում Նորատուսի համայնքի ֆոնդային բյուջե մուտքագրված մոտ 31 մլն դրամն ուղղել Նորատուսի Վ. Մամիկոնյան փողոցի հիմնանորոգմանը:
Սյունիքի մարզի Շաքի գյուղի վարչական տարածքում նոր մաքսատուն կառուցելու նպատակով կառավարության որոշմամբ համայնքի քաղաքացիների սեփականությունը հանդիսացող 7.1 հա և համայնքի սեփականությունը հանդիսացող 0.56 հա գյուղատնտեսական նշանակության հողերի նկատմամբ ճանաչվել է բացառիկ` գերակա շահ:
Կառավարության որոշմամբ ՀՀ ԿԱ պետական գույքի կառավարման վարչության աշխատակազմին ամրացված Երևանի Շիրակի 2ա, Վարդաշենի 6-րդ փողոցի 66/1 և Մոլդովական 70 թիվ 1 հասցեներում գտնվող հանրակացարաններում, ինչպես նաև Աբովյան քաղաքի Ճարտարագիտական քոլեջի հանրակացարանում բնակվող՝ 1988-1992թթ. Ադրբեջանի Հանրապետությունից բռնագաղթած և ՀՀ քաղաքացիություն ստացած բնակիչներին սեփականաշնորհել իրենց զբաղեցրած բնակելի տարածքները :
Ջրի որակի վերահսկումը առողջության գրավականն է
ՀՀ կառավարությունը հաստատել է`
-ՀՀ արտաքին գործերի նախարարության «Ժամանակակից տեխնոլոգիաների կիրառումը քաղցրահամ ջրի մոնիթորինգի և պահպանման գործում» ծրագրի արտաբյուջետային միջոցների ծախսման 2013թ. նախահաշիվը. ՅՈՒՆԵՍԿՕ-ի կողմից իրականացվող ծրագրով պետական տարբեր մարմիններ և ակադեմիական շրջանակներ ներկայացնող շուրջ 50 մասնակիցներ կծանոթանան ջրային էկոհամակարգերում քաղցրահամ ջրի վերահսկման և պահպանման ժամանակակից տեխնոլոգիաներին և բիոգնահատման տարբեր եղանակներին,
-ՀՀ գյուղատնտեսության նախարարության սննդամթերքի անվտանգության պետական ծառայության կողմից իրականացվող ստուգումների ստուգաթերթերը,
-ՀՀ ֆինանսների նախարարության «Կարողությունների զարգացում արտաբյուջետային միջոցների հաշվին» ծրագրի արտաբյուջետային հաշվի միջոցների ծախսման 2013թ. նախահաշիվը,
-«Պետական մասնակցությամբ առևտրային կազմակերպությունների` որոնց բաժնետոմսերի 50 կամ ավելի տոկոսը պատկանում է պետությանը (բացառությամբ ՀՀ քաղաքացիական օրենսգրքով սահմանված կազմակերպական-իրավական ձև չունեցող առևտրային կազմակերպությունների)» լուծարման կարգը,
-ՀՀ առողջապահության նախարարության աշխատակազմի կանոնադրությունն ու կառուցվածքը հաստատելու փոփոխություններն ու լրացումը, որոնք միտված են նախարարության առջև դրված խնդիրների ու նպատակների լիարժեք իրականացմանը :
Գործադիրը սահմանել է ՀԴՄ միջոցով օրվա ընթացքում իրականացված դրամական հաշվարկների հանրագումարի վերաբերյալ տեղեկությունները ցանցային կապի միջոցներով հարկային մարմին ուղարկելու պարտադիր ժամկետները:
Օրենսդրական նախաձեռնություններ
ՀՀ կառավարությունը հավանություն է տվել «Կրթության մասին» և ևս երկու օրենքներում փոփոխություններ և լրացումներ կատարելու օրինագծերի փաթեթին, որը միտված է ոլորտում ընթացող բարեփոխման և իրավական դաշտի ներդաշնակեցմանը և կարող է նպաստել նախնական, միջին և բարձրագույն մասնագիտական կրթության յուրաքանչյուր մակարդակում սահմանված ուսումնառության արդյունքի նպատակային օգտագործմանը, աշխատաշուկայի մրցունակության բարձրացմանը:
Կառավարության հավանությունն է ստացել «Բնապահպանական և բնօգտագործման վճարների մասին» օրենքում փոփոխություններ կատարելու օրենքի նախագիծը, որի նպատակն է Արարատյան դաշտում ստեղծել ջրային պաշարի օգտագործման բնապահպանական տեսանկյունից ավելի կանոնակարգված և հավասարակշռված իրավիճակ, երբ տնտեսական օգուտը կգնահատվի բնապահպանական իրական վնասի համադրմամբ: Արարատյան ջրավազանի ջրօգտագործման ծավալի նվազեցման կամ աճի դադարեցման շնորհիվ բնապահպանական բարդ իրավիճակը կբարելավվի, կապահովվի ջրային պաշարի կայուն օգտագործումը :
Գործադիրը հավանության է արժանացրել «Ոստիկանությունում ծառայության մասին» և ևս երկու օրենքներում փոփոխություններ և լրացումներ կատարելու օրենքների նախագծերը, որոնց ընդունման դեպքում կբարձրանա ոստիկանության մարդկային ռեսուրսի կառավարման արդյունավետությունը:
Նիստում հավանություն է ստացել ՀՀ քրեական և ՀՀ վարչական իրավախախտումների վերաբերյալ օրենսգրքերում լրացումներ կատարելու օրենքների նախագծերի փաթեթը, որով առաջարկվում է համաշխարհային թմրաբիզնեսի նոր սերնդի «Սփայս» անվամբ դիզայներական թմրամիջոցները և համանման նյութերը ներառել ՀՀ տարածքում արգելված թմրամիջոցների և հոգեմետ դեղերի ցուցակ:
Գործադիրը քննարկել է ՀՀ քրեական օրենսգրքում փոփոխություն և լրացում կատարելու օրենքի նախագիծը, որն օրենսդրական նախաձեռնության կարգով ներկայացրել են ՀՀ Ազգային ժողովի մի խումբ պատգամավորներ: Օրինագիծը միտված է վերացնել ՀՀ քրեական օրենսգրքում առկա իրավակարգավորիչ անհամաչափ միջոցները` բացառելով դատապարտյալ անձի վիճակի անհիմն վատթարացումը: Նախագծի վերաբերյալ կառավարությունը սկզբունքային առարկություն չի ներկայացրել:
Քննության է առնվել «Ավելացված արժեքի հարկի մասին» օրենքում փոփոխություն կատարելու օրենքի նախագիծը, որը օրենսդրական նախաձեռնության կարգով ներկայացրել է ՀՀ Ազգային ժողովի պատգամավոր Մարտին Սարգսյանը: Նա առաջարկում է ձեռնարկատիրական գործունեության իրավունք ունեցող ոչ առևտրային կազմակերպությունները ևս համարել ԱԱՀ վճարող: Ըստ կառավարության եզրակացության օրենքի նախագիծը լրամշակման կարիք ունի. գործադիրը պատրաստ է մասնակցելու նախագծի լրամշակմանը` արծարծված խնդիրը կարգավորելու նպատակով:
Վերը նշված օրենքների նախագծերը և կառավարության եզրակացությունները սահմանված կարգով կներկայացվեն ՀՀ Ազգային ժողով:
Այլ հարցեր
ՀՀ կառավարությունը յոթ միլիոն դրամ է հատկացրել ՀՀ մշակույթի նախարարությանը` Անտոն Քոչինյանի ծննդյան 100-ամյակին նվիրված հոբելյանական միջոցառումների ծրագրով նախատեսված «Անտոն Քոչինյան. կյանքը և գործունեությունը» և «Անտոն Քոչինյանը ժամանակակիցների հուշերում» գրքերը տպագրելու համար:
Կառավարությունը ուժը կորցրած է ճանաչել Արտաշատի «Օրիենտ ֆարմ» ՍՊԸ-ին 2011թ. տրված թմրամիջոցների և հոգեմետ նյութերի կամ դրանց պրոկուրսորների ներմուծման, արտահանման կամ մեծածախ առևտրի գործունեության իրականացման արտոնագիրը:
Կառավարության որոշմամբ ԱՄՆ Մասաչուսեթսի Բրանդիսի համալսարանի բակալավրիատի սան (կենսաբանություն մասնագիտությամբ) Վարդգես Ծերունյանին տարկետում է տրվել մինչև ուսումնառության ավարտը` 2017 թ. գարնանային զորակոչը:
Գործադիրը որոշել է Կարեն Թամազյանին նշանակել ՀՀ ֆինանսների նախարարության աշխատակազմի ղեկավար:
ՀՀ ԿԱՌԱՎԱՐՈՒԹՅԱՆ
ՏԵՂԵԿԱՏՎՈՒԹՅԱՆ ԵՎ ՀԱՍԱՐԱԿԱՅՆՈՒԹՅԱՆ
ՀԵՏ ԿԱՊԵՐԻ ՎԱՐՉՈՒԹՅՈՒՆ
