Ինչպես տեղեկացրել ենք, քիչ առաջ նախագահականի մոտ տեղի ունեցան բախումներ: Մինչ միջադեպը, Մաքսային միություն մտնելու Սերժ Սարգսյանի որոշման դեմ բողոքի ակցիա անող ակտիվիստները հանկարծ որոշեցին մոտենալ նախագահի նստավայրին եւ իրենց ասելիքն ավելի մոտ մայթից ասել: Սակայն նրանց դիմադրեցին ոստիկանները:
Ակտիվիստների շարքերն աստիճանաբար համալրվեցին եւ նրանք սկսեցին պահանջել, որ թույլ տան մարդկանց ազատ տեղաշարժվել Բաղրամյան 26-ում:
Ակտիվիստները գոռում էին Սերժ Սարգսյանին՝ «հեռացիր»: Ոստիկանները պահանջում էին անցնել դիմացի մայթ:
Այդ ընթացքում խաթարվել էր Բաղրամյան պողոտայի երթեւեկությունը, քանի որ ակտիվիստների մի մասը որոշեց դիմացի մայթ անցնելու փոխարեն նստել հենց փողոցի կենտրոնում:
Կարդացեք նաև
Ոստիկանները բիրտ ուժ կիրառեցին, ընդ որում, բախումների ժամանակ շոկի մեջ հայտնվեց «Սիվիլնեթի» լրագրողը՝ Արփի Մախսուդյանը: Նա կանգնել էր միջադեպի թեժ ժամանակ նախագահականի առջեւ եւ հոնգուր-հոնգուր լաց էր լինում:
Ավելի ուշ նա մեզ հետ զրույցում պատմեց. «Ոստիկանները փորձում էին ինձ հրել, գցել նստած մարդկանց վրա: Իմ վրա մի ոստիկան էր, այդ ոստիկանի վրա՝ մի հատ ուրիշ ոստիկան: Ու եթե մենք ընկնեինք՝ մեր տակի աղջիկը կմեռներ: Եթե ես չփաթաթվեի մի ոստիկանի վզից ու չպահեի ինձ օդում, ես ընկնելու էի այդ աղջկա վրա, ու նա կմեռներ, որովհետեւ իմ վրա 3 հատ այս չափի ոստիկան էր: Ոստիկանները հետեւից հրում էին՝ շատ լավ հասկանալով, որ մենք ընկնում ենք: Ինքը գիտակցված հրում էր: Մենակ այն փաստից, որ ես ասացի՝ լրագրող եմ, նոր սկսեցին բաց թողնել»:
Ավելի ուշ, երբ ակցիայի ակտիվիստներից մի քանիսին բռնի ուժով բերման ենթարկեցին, իրավիճակը նախագահականի առջեւ մի փոքր հանդարտվեց: Միջադեպին միացավ Երեւանի փոխոստիկանապետ Վալերի Օսիպյանը, որը բարձրախոսով հանդարտության կոչ արեց եւ սպառնաց, որ եթե որեւէ մեկը հասարակական կարգ խախտի՝ կենթարկվի պատասխանատվության: Ակտիվիստները սկսեցին սուլել նրան եւ ոստիկաների հասցեին բղավել՝ «Նատաշաներ»:
Հռիփսիմե ՋԵԲԵՋՅԱՆ
