«Այն ընդդիմությունը, որը իշխանությունների համար ցանկալի է, նրանց ե՛ւ գործ են առաջարկում, ե՛ւ բիզնես ե՛ւ պաշտոններ են թողնում»,- «Ժողովրդավարական հայրենիք» կուսակցության նախագահ Պետրոս Մակեյանն այսպես արձագանքեց ՀՅԴ բյուրոյի անդամ Վահան Հովհաննիսյանի՝ Գերմանիայում ՀՀ դեսպան նշանակվելու լուրին:
Նրա խոսքերով, Վահան Հովհաննիսյանը Դաշնակցության շարքային անդամ չէ եւ դեսպանի պաշտոնն ընդունելը կուսակցության ղեկավարության որոշմամբ պետք է լինի. «Իսկ կուսակցությունն իր գործելաոճով թույլ է տվել, որ Հովհաննիսյանը անձնապես որոշում ընդունի: Կարծում եմ, որ ՀՅԴ-ի համար իշխանության այս մոտեցումը, առաջարկը պայմանավորված է նրանով, որ ՀՅԴ-ն ցանկալի ընդդիմություն է, դրա համար իշխանությունները մեղմ վերաբերմունքով նման առաջարկություններ են անում: Տարբեր չափորոշիչներով են մոտենում քաղաքական ուժերին: Այն քաղաքական ուժը, որին իշխանությունը չի զրկում պաշտոններից, թթվածինը չի փակում, ցանկալի քաղաքական ուժ է իր համար, նույնիսկ եթե կոալիցիայի մեջ չեն, բայց իրենց համար ցանկալի են, ինչպես ԲՀԿ-ն»:
Պետրոս Մակեյանի կարծիքով, Դաշնակցությունը ժամանակին կամ կեղծում էր, երբ քննադատում ու ընդդիմանում էր հայ-թուրքական արձանագրություններին եւ պահանջում արտաքին գործերի նախարարի հրաժարականը կամ էլ դիրքորոշումն է փոխել. «Կամ նախկինում են կեղծել կամ հիմա պետք է փոխվեն: Համենայնդեպս կամ ազնիվ չեն եղել, թատերական ներկայացում են արել կամ էլ հիմա Վահան Հովհաննիսյանը պետք է փոխի իր դիրքորոշումը: Գերմանիայում Հայաստանի արտաքին քաղաքականությունը չի՞ ներկայացնելու: Ինձ համար ամեն ինչ էլ լավ հասկանալի է»:
Արփինե ՍԻՄՈՆՅԱՆ
Կարդացեք նաև
Դաշնակցությունը կեղծել է, կեղծում է և կկեղծի