«Ամբողջովին հերյուրանք է, թե աշակերտը տեսողությունը գրեթե կորցրել է ուսուցչի հարվածի արդյունքում: Մեղադրանքը, որ ներկայացրել են ծնողները շինծու է եւ իրականությանը չի համապատասխանում, ինչպես նաեւ չի համապատասխանում տեսողությունը կորցրած երեխայի մոր հայտարարությունը, թե մինչ իրենց գյուղ տեղափոխվելը Սուսաննա Գալոյանը աշխատել է հարեւան գյուղերից մեկի` Նորաբացի դպրոցում, սակայն տնօրենը նրան հեռացրել է մեկ այլ երեխայի ծեծելու համար»,-այս մասին այսօր «Ֆորում» մամուլի ակումբում ասաց Դարակերտի միջնակարգ դպրոցի մաթեմատիկայի ուսուցչուհի Սուսաննա Գալոյանի ամուսին` Ազատ Խաչատրյանը` հավելելով, որ նախորդ աշխատավայրում ուսուցչուհին ազատվել է իր դիմումի համաձայն:
Հիշեցնենք, որ աղմուկը բարձրացավ այն ժամանակ, երբ տեղեկություն տարածվեց, թե Արարատի մարզի Դարակերտ գյուղի միջնակարգ դպրոցի մաթեմատիկայի ուսուցչուհու հարվածի հետեւանքով 6-րդ դասարանի աշակերտը կորցրել է տեսողությունը 90 տոկոսով, եւ այն այլեւս ենթակա չէ բուժման:
Ուսուցչուհու ամուսինը հավաստիացնում է, որ գյուղում չկա մի բնակիչ, մի աշակերտ, մի ծնող, որ բողոքած լինի իր կնոջից: «Կինս 40 տարվա մանկավարժ է, բայց ոչ ուսուցչական կոլեկտիվը եւ ոչ էլ աշակերտները չեն ասի, որ Գալոյան Սուսաննան որեւիցե մեկին խփել է: Նման բան չի եղել, իմ կինը չի հարվածել այդ երեխային, որի մասին վկայել են թե ուսուցիչները, եւ թե աշակերտները»,-ընդգծեց նա` նշելով, որ եթե անգամ նման հարված լիներ երեխայի դեմքին, ապա այն անզեն աչքով տեսանելի կլիներ կապտուկի տեսքով, որը չեն տեսել այդ օրը հաջորդ դասաժամերը դասավանդած ուսուցիչները, երեխան մնացել է մինչեւ դասերի ավարտը, իսկ հաջորդ օրը կրկին գնացել է դասի:
Մանկավարժ Սուսաննա Գալոյանի փաստաբան Արմեն Օհանյանն էլ ասաց, որ ասուլիս չէր հրավիրվի, եթե այսքան մեծ աղմուկ չբարձրանար եւ միջադեպն էլ միակողմանի չլուսաբանվեր: Վերջինիս փոխանցմամբ`բուժզննումն իրականացվել է հունիս ամսին, այն էլ ոչ այն պատճառով, որ երեխան դժգոհություններ է ունեցել տեսողության հետ կապված, այլ ըստ ծրագրի` ամբողջ դասարանի աշակերտներն են անցել այդ զննումը, որի ընթացքում պարզ է դարձել, որ այդ դասարանում կան չորս երեխաներ, ովքեր տեսողության հետ կապված խնդիրներ ունեն` հավելելով, որ ապրումների հետեւանքով ուսուցչուհին այսօր գտնվում է հիվանդանոցում եւ ունի առողջական լուրջ խնդիրներ, իսկ թե հատկապես ինչ առողջական խնդիր ունի եւ որ հիվանդանոցում է պառկած` հրաժարվեց պատասխանից` պատճառաբանելով, թե վերջինիս հանգիստ է հարկավոր եւ հայտնելու դեպքում լրագրողները նրանից եւս կփորձեն պարզաբանումներ ստանալ:
Կարդացեք նաև
Ուսուցչուհու ամուսինը համոզված է, որ այս ամենը սպառնալիք է իր ընտանիքի նկատմամբ. «Սա ընդամենը շանտաժ է իմ, իմ կնոջ եւ իմ ընտանիքի նկատմամբ գումար կորզելու: Երեխայի մայրը հոգեգալստական է, եւ կարծում եմ, որ այս գործընթացների հետեւում գտնվում են որոշ ուժեր, որոնք ուզում են պղտոր ջրում ձուկ բռնել»:
Ինչ վերաբերում է, թե Խաչատրյանը գնացել է տուժողի տուն եւ գումար առաջարկել, վերջինս հերքեց. «Ես իրենց տուն չեմ գնացել. դա հերյուրանք է: Մենք հանդիպել եւ զրուցել ենք դրսում, թե ինչու են այդպես աղմուկ-աղաղակ բարձրացրել եւ մարդկայնորեն առաջարկել եմ իմ օգնությունը: Հայրը ինձանից գումար է ուզում իրենց լռելու դիմաց, որի մասին մինչեւ այսօր չեմ բարձրաձայնել: Ինչո՞ւ տամ, եթե գիտեմ, որ երեխայի տեսողության կորուստը կնոջս հարվածի հետեւանքով չի եղել»:
Քրիստինա ՄԻՐԶՈՅԱՆ
