Սեպտեմբերի յոթին՝ Խորովածի համաշխարհային օրվա կապակցությամբ Ախթալայում կկազմակերպվի խորովածի, երաժշտության և արվեստի փառատոն: Այդ օրը Ախթալան խորովածի համաշխարհային մայրաքաղաք կհռչակվի:
Հայկական խոհարարական ավանդույթների զարգացման ու պահպանման հ/կ նախագահ Սեդրակ Մամուլյանը տեղեկացրեց, որ փառատոնին կմասնակցեն ներկայացուցիչներ ՌԴ-ից, Վրաստանից, մասնակցության հայտ է ներկայացրել նաև եզդիների համայնքը: Մասնակիցները կմրցեն «Լավագույն համ», «Լավագույն տեսք», «Լավագույն մտահղացում» անվանակարգերում:
Պարոն Մամուլյանը հայտնեց, որ այսուհետև սեպտեմբերի առաջին շաբաթ օրը կնշվի որպես խորովածի համաշխարհային օր:
Սեդրակ Մամուլյանը նաև հավելեց. «Արդեն հինգերորդ անգամ է նշվում փառատոնը: Նպատակն է կազմակերպել տոնախմբություն, որի ժամանակ հասարակության բոլոր շերտերը կարող են միասին զրուցել, համտեսել: Արդյունքում նպատակ ունենք ՀՀ-ն գրավիչ դարձնել զբոսաշրջության համար»:
Կարդացեք նաև
Նա նաև շեշտեց այն հանգամանքը, որ այս առումով մենք մրցակցության մեջ ենք մեր հարևանների հետ: Նա հիշեցրեց այն, որ Թուրքիան բավականին գումարներ ծախսելով՝ ՅՈՒՆԵՍԿՕ-ում քաշիկա ուտեստի վերաբերյալ ինչ-որ բանաձև է առաջ քաշել, որում նշվում է, որ այդ ուտեստը օգտագործվում է Թուրքիայում մի ազգային փոքրամասնության կողմից:
Aravot.am-ը հետաքրքրվեց՝ իսկ ՀՀ-ում պետական մակարդակով աջակցություն կա՞ այս խնդիրների լուծման համար: Պարոն Մամուլյանը պատասխանեց. «ՅՈՒՆԵՍԿՕ-ի ամենամեծ դոնորները Թուրքիան և Ադրբեջանն են, նրանք պետական մակարդակով աշխատում են մեզ հակահարված տալու համար: Այս առումով մենք այնքան ենք հետ մնացել, որ միանգամից այնպիսի միջավայր ստեղծենք, որ պետական բոլոր կառույցները շահագրգռված լինեն ու ընկալեն դրա կարևորությունը»:
Ս. Մամուլյանը նշեց, որ փառատոներին ակտիվ մասնակցություն են ունենում նաև ՀՀ ԱԺ պատգամավորներ: Հետաքրքրվեցինք՝ նրանք աջակցո՞ւմ են իրենց: Պարոն Մամուլյանը պատասխանեց. «Այն պատգամավորները, ովքեր ակտիվ են մեր փառատոներում, մեծ կարողություն չունեն, իսկ կարողություն ունեցողների համար դեռ քյաբաբն ու համապատասխան երաժշտությունը առաջնային են»:
The Beautified Project խմբի մենակատար Անդրե Սիմոնյանի փոխանցմամբ՝ փառատոնի բացումը կլինի հայ ժողովրդական երաժշտությամբ, այնուհետև կհնչի ժամանակակից, հետո կրկին անցում կկատարվի հայ ժողովրդական երաժշտությանը:
Իսկ ՀՀ էկոնոմիկայի նախարարության տուրիզմի և զբոսաշրջության վարչության պետ Մեխակ Ապրեսյանը կարևորեց այն, որ եղած միջոցներն առավել արդյունավետ օգտագործվեն ու հավելեց. «Պետք է աշխարհին հայտնի դարձնենք մեր խոհանոցը»:
Տաթև ՀԱՐՈՒԹՅՈՒՆՅԱՆ
