Այս ուսումնական տարում Երեւանի պետական համալսարանում կսովորի 3414 առաջին կուրսեցի, որոնցից 408-ը՝ անվճար, 3006-ը՝ վճարովի համակարգով:
Երեկ՝ նոր ուսումնական տարվա առաջին օրը «Առավոտը» զրուցեց ԵՊՀ ժուռնալիստիկայի ֆակուլտետի դեկան Նաղաշ Մարտիրոսյանի հետ:
Պարոն Մարտիրոսյանն ասաց, որ այս տարի 76 ուսանող է ընդունվել ԵՊՀ ժուռնալիստիկայի ֆակուլտետ, ու դիմորդների թիվը նույնքան մեծ է եղել, ինչպես նախորդ տարի, բայց բացառիկ էր մի իրողությամբ՝ տղաների թիվը եռապատկվել է: Այս տարի 15 տղա է ընդունվել ժուռնալիստիկայի ֆակուլտետ: «Վերջին մի քանի տարում նման բան չի եղել: Սա նշանակում է, որ լրագրություն մասնագիտության հանդեպ էլ է մեծանում տղաների հետաքրքրությունը: Ուրախալի է այն հանգամանքը, որ դիմորդների վաստակած միավորները համեմատելիս տեսնում ես, որ տղաները նույնպես բարձր միավորներով են ընդունվել»,-փաստեց պարոն Մարտիրոսյանը: Նա նշեց, որ առաջին կուրսեցիների հանդիպման ժամանակ շեշտել է, որ ժուռնալիստիկան այն մասնագիտությունն է, որն անընդհատ ենթադրում է նորություն ու նորարարություն: «Կրթական ոլորտում միշտ նորի որոնումը մեր ֆակուլտետի թիվ մեկ անելիքն է, որովհետեւ մեդիադաշտն անընդհատ զարգանում է, ու մեդիադաշտին պետք է անընդհատ համաքայլ գնալ, հակառակ պարագայում, այն շրջանավարտը, որը ավարտում է ժուռնալիստիկայի ֆակուլտետը, մրցունակ չի կարող լինել: Բարեբախտաբար, ԵՊՀ ժուռնալիստիկայի ֆակուլտետի շրջանավարտներն ամենուր են, բոլոր առաջատար լրատվամիջոցներում: Նրանք անդրադառնում են տարբեր ոլորտների ու թեմաների եւ տվյալ ոլորտի լավագույն մասնագետներից են: Մեր շրջանավարտները իրենց ԶԼՄ-ներում անդրադառնում են սոցիալական, քաղաքական, մշակութային, կրթական, միջազգային, տնտեսական եւ այլ խնդիրների: Այսինքն՝ ֆակուլտետն ավարտում են մարդիկ, որոնք այս կամ այն ոլորտում ասելիք եւ անելիք ունեն»,- կարծում է դեկանը: Նա համոզված է՝ «Խնդիրը լուծելի կլինի, եթե մագիստրատուրայում շարունակենք մասնագիտացումների հարցը լուծել: Մենք ունենք PR մագիստրոսական ծրագիր, այսինքն՝ լրագրողական կրթու
թյուն ստացած մարդը կարող է մասնագիտանալ PR ոլորտում, ընդհանուր մասնագիտական կրթություն ստացած մարդը միջազգային եւ քաղաքական ժուռնալիստիկա մագիստրոսական ծրագրով մասնագիտանում է այդ ոլորտում…»: Նաղաշ Մարտիրոսյանի ձեւակերպմամբ, հաջողության հասնելու թիվ մեկ պայմանը լավ ուսուցիչ ունենալն է. «Մենք անվերջ որոնում ենք դաշտում նրանց, ովքեր բացի լավ լրագրող լինելուց, կարող են նաեւ լավ ուսուցիչ լինել: Գաղտնիք չէ, հաճախ պայծառ լրագրողը որպես մանկավարժ քննություն չի բռնում եւ դիցուք, մեկ տարի դասախոսելուց հետո հրաժարվում է այս մտքից: Եվ բակալավրիատում եւ մագիստրատուրայում մենք աշխատում ենք ներգրավել ԶԼՄ-ների (հեռուստաընկերությունների, ռադիոընկերությունների, օրաթերթերի, առցանց ԶԼՄ-ների) առաջատար աշխատակիցներին, հրավիրում ենք վարելու վարպետության դասընթացները»:
Կարդացեք նաև
Մեր զրուցակիցը կարեւորեց նաեւ մասնագիտական քննությունների անցկացումը, որոնցով արդեն երրորդ տարին է՝ ընտրում են ժուռնալիստիկայի ֆակուլտետի դիմորդներին: Ինչ վերաբերում է «Բանավոր հաղորդակցման մշակույթ» քննությանը, ժուռնալիստիկայի ֆակուլտետի դեկանի խոսքով, քննական հանձնաժողովը, որի կազմում սովորաբար լինում են տարբեր ԶԼՄ-ների ներկայացուցիչներ, քննության ժամանակ փորձում է ճշտել՝ ժուռնալիստ դառնալու ցանկություն ունեցող մարդը իրազե՞կ է լրատվադաշտին, տեղյա՞կ է՝ ուր է գալիս, հետեւո՞ւմ է լրահոսին, թե՞ ընդամենը ցանկություն ունի ընտրել գայթակղիչ ու հայտնի դառնալու մասնագիտությունը:
Գ. ՀԱԿՈԲՅԱՆ
«Առավոտ» օրաթերթ
