Սեպտեմբերի 6-ին կայանալիք Չեխիա-Հայաստան հանդիպումից առաջ ֆուտբոլի Հայաստանի ազգային հավաքականի անդամ Հենրիխ Մխիթարյանը Ֆրանկֆուրտում կայացած արտագնա հանդիպումում երկու գոլ խփեց «Այնտրախտի» դարպասը եւ ոչ միայն հաղթանակ պարգեւեց Դորտմունդի «Բորուսիային» ու գլխավոր մարզիչ Յուրգեն Կլոպի թիմին դուրս բերեց Բունդեսլիգայի մրցաշարային աղյուսակի 1-ին հորիզոնական, այլեւ բացեց գոլերի հաշվարկը Գերմանիայի առաջնությունում:
Մխիթարյանը նաեւ գործով պատասխանեց գերմանական որոշ լրատվամիջոցների, որոնք գրում էին, թե հայաստանցի ֆուտբոլիստը Ուկրաինայի առաջնությունում գոլեր հեղինակելով` գերազանցել է ռմբարկուական ռեկորդները, սակայն կասկածում էին, թե նա կարող է աչքի ընկնել նաեւ Գերմանիայի առաջնությունում: Եվ Մխիթարյանը, որ խոստացել էր ամեն բան հնարավորին չափ արագ կարգավորել, ցույց տվեց, որ ինքը վնասվածքից հետո եթե լավագույն մարզավիճակում չէ, ապա արդեն մոտ է դրան:
Մխիթարյանի հնարավորություններին կասկածողներին յուրովի պատասխանել է «Բորուսիայի» գլխավոր մարզիչ Յուրգեն Կլոպը, որը ֆուտբոլիստի դուբլից հետո լրատվամիջոցներին, մասնավորապես, հայտարարել է. «Հիմա շատերը հասկացան, թե ինչի համար ձեռք բերեցինք Հենրիխ Մխիթարյանին»: Մասնագետը նաեւ ավելացրել է. «Մենք «Այնտրախտի» դարպասը գրավելու լավ հնարավորություններ ստեղծեցինք: Այդուհանդերձ, մրցակիցն առաջին խաղակեսում օրինաչափորեն հավասարեցրեց հաշիվը, քանի որ մենք այդ դրվագում լավագույն ձեւով չգործեցինք: Երկու թիմերի ֆուտբոլիստներն էլ երկրորդ խաղակեսում տրվեցին ամբողջովին: Իսկ Հենրիխ Մխիթարյանը հիանալի գոլ խփեց»:
Ինքը` Հենրիխ Մխիթարյանը, խաղից հետո չի թաքցրել ուրախությունը: «Ես «Բորուսիայում» ինձ գերազանց եմ զգում: Շատ ուրախ էի պաշտոնական խաղում իմ նոր թիմում խփած առաջին գոլի համար: Բայց ավելի ուրախացա, երբ երկրորդ գոլն էլ խփեցի: Հանդիպումն ընդհանուր առմամբ հեշտ չստացվեց: Բայց մենք դեռ կարող ենք մեր խաղն ավելի կատարելագործել»,- հայտարարել է ֆուտբոլիստը հանդիպումից հետո:
Կարդացեք նաև
Ի դեպ, ԶԼՄ-ները գրում են նաեւ, որ Կլոպն ու Մխիթարյանը գրազ եկած են եղել ու մարզիչը պարտվել է: Եվ դա խոստովանել է ինքը` Յուրգեն Կլոպը: «Ես նրան պարտվել եմ գրազով: Ես Հենրիխին ասում էի, որ եթե 30 փորձից հետո 7 գոլ չխփի, ինձ 50 եվրո է վճարելու: Հիմա նա մեր կազմում արդեն 7 գոլի հեղինակ է դարձել եւ խաղից հետո ինձ խնդրել է վճարել իր շահած գումարը»,- կատակել է մասնագետը:
ԱՇՈՏ ՀԱԿՈԲՅԱՆ
«Առավոտ» օրաթերթ
