Արդարադատության նախարարության «Նուբարաշեն» քրեակատարողական հիմնարկի կալանավոր, «ՍՏՇ Պիրամիդա» ՍՊ ընկերության տնօրեն Հրաչյա Սարգսյանը երկրորդ անգամ է դիմում հացադուլի:
Հ.Սարգսյանը 9 ամիս է, ինչ անազատության մեջ է, նրա գործը դեռ դատարան չի ուղարկվել, եւ ինչպես տեղեկացրել ենք, այդ գործն առնչվում է ՊՆ նախարար Սեյրան Օհանյանի հոր՝ Մուշեղ Օհանյանի հիմնադրած ՍՊ ընկերության հետ:
Նախկինում հացադուլը դադարեցվեց, քանի որ պաշտպանական կողմի՝ Ռուբեն Բալաբանյանի միջնորդությունը ոստիկանության Կենտրոնականի քննչական բաժնի ՀԿԳ քննիչ Արայիկ Պողոսյանը բավարարեց, այն է՝ Սարգսյանի կողմից վերցված վարկերը հետազոտվեցին, պարզվեց, որ նա ստորագրել է իր վերցրած վարկերի համար, եւ յուրացնելու, հափշտակելու խնդիր չի եղել, ինչպես փորձում են մեղադրանքի հիմքում այսօր դնել:
Ընկերության հիմնադիրներից փարիզաբնակ Քրիստիան Զադիկյանի (45 % բաժնետերն է, մնացած մասը Մուշեղ Օհանյանինն է-Ռ.Մ. ) բացատրությունից հետո է Հրաչյա Սարգսյանը հայտնվել անազատության մեջ:
Կարդացեք նաև
Հիմնադիրները հայտնել են, թե իրենք տեղյակ չեն, որ իրենց անունից Հ. Սարգսյանը ստորագրել է 1 միլիոն 100 դոլարի վարկի տակ՝ փորձելով յուրացնել:
Նշենք, որ մինչ այդ՝ 2006-2009թթ. Սարգսյանը ստացել է վարկեր, ստորագրելով 900 000 դոլարի, 300 000 դոլարի վարկերի տակ:
«ՍՊ ընկերությանը որեւէ վնաս չի պատճառվել», -ասում է փաստաբան, Հ.Սարգսյանի պաշտպան Ռուբեն Բալաբանյանը:
Ռուզան ՄԻՆԱՍՅԱՆ
