Թուրքագետ Արտակ Շաքարյանը այսօր «Հենարան» ակումբում ասաց, թե ԱՄՆ-ի այսօրվա տրամադրությունը շատերը համեմատում են հետվիետնամական ԱՄՆ-ի հետ. «Եթե Օբաման շատ հարվածներ տեղա Սիրիայի` մասնավորապես Հալեպի վրա, ապա դա հայ ազգաբնակչության համար կլինի եւս մեկ կոտորած: Հալեպում մեծ խնդիրներ ունենք, այնտեղ անիշխանություն է, ապստամբներն իրենք բաժանվել են մի քանի մասի, իրար դեմ են: Արդեն Հալեպի փախուստի ճամփան են փակել, որն այլեւս անվտանգ չէ ու հսկվում է զինյալների կողմից»:
Ինչ վերաբերվում է Իրանին, ապա նա շատ մեծ հույս ունի, որ Օբաման չի հարվածի` «Նա ոչ մի դեպքում չի ցանկանա ներգրավվել այդ պատերազմում, քանի որ ցանկանում է ունենալ միջուկային զենք, բայց հասկանում է, որ այս ամբողջ պատմությունը Ասադի համար չէ, ոչ մեկի համար չէ, այլ Իրանի դեմ է: Սիրիան այսօր միակ սահմանն է, որ Իրանի համար բաց է, իսկ Սիրիայի ոչնչացումը իրանի համար բերում է մեկուսացման»:
Ըստ Շաքարյանի` Իրանը գիտակցում է, որ այս ամենը բերում է դեպի հաջորդ թիրախը` Իրան: Ու այդ ամենը գիտակցում է նաեւ Ռուսաստանը, քանի որ Սիրիան ոչնչացնելով միայնակ կմնա նաեւ Ռուսաստանը, բայց թուրքագետը վստահ է, որ նա մինչեւ վերջին կաթիլը թույլ չի տա Սիրիայի ոչնչացումը, բայց ինչպես ասում են` գորգի տակից կփորձի սադրել ԱՄՆ-ին:
Եվա ՀԱԿՈԲՅԱՆ
