Aravot.am-ը Գյումրու ժուռնալիստների «Ասպարեզ» ակումբի խորհրդի նախագահ Լեւոն Բարսեղյանին խնդրեց գնահատել այն երկու բարձրաստիճան ոստիկանների արարքը, ովքեր այսպես ասած փորձում էին կտրել գողերի հացը, պատրաստվում էին թալանել Գյումրու կենտրոնում գտնվող «Ռուբին» ոսկերչական սրահը:
«Ես մի անգամ կարծեմ բացատրել եմ, որ չէին կարող գողության փորձ անող ոստիկանները չիմանալ, որ տեսաձայնագրվում, հսկվում է այդ տարածքը, բայց իմանալով` դա արել են: Ուրեմն, կարծում եմ, որ ինչ-որ մի տեղից, ինչ-որ մի կերպ երաշխիք են ունեցել, որ էդ սարք ու սուրքը անջատված կլինի: Սա տրամաբանական դատողություն է, կարող է, սխալվում եմ, եւ հետաքննությունը պարտավոր է նաեւ էդ հանգամանքները պարզել, որովհետեւ 10-15 տարվա փորձ ունեցող, ոստիկանական աշխարհում աշխատած մարդիկ չեն կարող նման անհեթեթ բանի գնալ` իմանալով, որ տեսագրվում է: Ուրեմն կամ անջատած են եղել իրենք, կամ մտածել են, որ անջատված է, ուրեմն երաշխիք են տվել, որ անջատված է: Չի բացառվում, որ իրենց տակը ահագին բան կա: Ձերժինսկուց եկած ժամանակներից հանցագործ աշխարհի սերտաճումը իրավապահ համակարգի հետ սովորական բան էր մինչեւ սովետի վերջ եւ դրանից հետո ո՞վ ասաց, որ մեզ մոտ արմատապես ինչ-որ բան է փոխվել:
Կալանավորներ կան, որոնց դռները միշտ բաց են, կալանավորներ կան, որոնք երբեք բանտի հացը չեն ուտում, դրսից բերած, առածն են ուտում, սիստեմն էնպիսին է, որ ինֆորմացիա տանել-բերել եւ այլն եւ այլն: Էս երկու աշխարհն իրար հետ սերտաճած է` հանցագործ աշխարհ եւ միլիցայական աշխարհ:
Շատ անակնկալ չէր ինձ համար իմանալ, որ էս ինչ խանութի կողոպուտի ժամանակ բռնվել են ոստիկաններ, էնքան է սերտաճած էդ աշխարհը, որ լոպո-լոպո խոսում է իրենց գեներալը. Էդ մարդը խաբար չէ. տարիներ շարունակ ասել ենք, որ քաղաքում զենք, թշնամանք կա էս-էս ընտանիքների միջեւ, իրենք սպասում են մինչեւ էդ զենքը աշխատի, խփեն իրար մարդիկ, հետո նոր գնան դիակ հավաքեն: Էս մասին ինչքան ենք խոսել, տարիներով խոսել ենք, բայց էդ մարդիկ կանխարգելիչ բաներ չեն անում, կամ չեն անում էդ մակարդակով, ինչ պետք է: Երեւի, ձեռնտու են էս տեսակ բախումները, արյունալի միջադեպերը, երեւի իրենց պայքարի միջոցների մեջ է սա, երեւի կինո են նայել ամերիկական մի քանի հատ, մտածել են լավագույն լուծումը դա է, թողնենք իրար գզեն, պրծին- երթան», -ասաց «Ասպարեզ» ակումբի նախագահը:
Կարդացեք նաև
Նա նաեւ ասաց, որ մինչեւ օրս Գյումրիից առգրավված զենքերի տերերից ոչ մեկը պատասխանատվության չի ենթարկվել ապօրինի զենք պահելու համար: «30 քանի զենք էին իբր բռնագրավվել, ցույց տվեցին, շոու սարքեցին, էդ բռնագրավվել բառը ինձ հուշեց, որ բռնի գրավել են: Հարցում եմ ուղարկել, հարցնում եմ` քանի քրեական գործ եք հարուցել էդ բռնագրավումների, առգրավումների փաստով, ասում են` ոչ մի հատ, կամավոր բերել-հանձնել են: Ցուցակն ունենք. էս ինչ տեղից, էս ինչ մարդն իբր բերել-հանձնել է, շատ լավ գիտենք, որ դա զոռով վերցված զենք է, բայց ոչ մի քրեական գործ չես հարուցել, այ ընկեր: Այսինքն, դու քո խելքով իրավապահ համակարգում ինչ-որ քվազի արդարադատական եղանակներ ես կիրառում, գտել ես, որ հա դե էդ ձեւով հարցը լուծում ես, զենք ես հավաքում իբր: Այնինչ, եթե գտել-բռնել ես, վերցրել ես ձեռքից, պիտի քրեական գործ հարուցես ապօրինի զենք պահելու համար: Չէ, ասում է մարդը կամավոր հանձնել է, ազատվել է պատասխանատվությունից: Ո՞նց եղավ, որ բերեց հանձնեց, լավ, չեմ հասկանում, էդ ինչի՞ ինձ չեն հանձնում, բերում, քեզ են հանձնում, Վովա Գասպարյան»,- հարցնում է Լեւոն Բարսեղյանը:
Նունե ԱՐԵՎՇԱՏՅԱՆ
