«Լուծեք մեր հարցերը, այլապես մենք կլուծենք ձեր հարցերը»,- այս կարգախոսով ու պահանջով այս պահին Երեւանի ճարտարապետաշինարարական համալսարանի մոտ են հավաքվել «Նիկոլ Աղբալյան» ուսանողական միության անդամները: Նրանք պատրաստվում են սկսել իրենց բողոքի երթը ՝ պահանջելով իջեցնել ուսման վարձերը:
«Ուսման վարձավճարների բարձրացման որոշումը տնտեսական այս ծանր պայմաններում ուսանողի գրպանին խիստ անհամաչափ է: Բարձրացնում են, որ կրթության որակ ապահովեն, բայց տարիներ շարունակ բարձրացրել են, իսկ դրանից կրթության որակը չի փոխվել: Մենք չենք վստահում ձեզ, ձեզ հետ հույսեր չենք կապում: Բոլոր ուսանողները, որոնք դեմ են այս ամեն ինչին, պատրաստ են պայքարելու իրենց իրավունքների համար,չեն պատրաստվում վճարել ապօրինաբար բարձրացված վարձերը , կոչ ենք անում միանալ մեզ»,- հայտարարեց միության ատենապետ Գերասիմ Վարդանյանը:
Ուսման վարձավճարների իջեցման պահանջին զուգահեռ՝ նրանք բողոքում են, որ անվճարունակ ուսանողներին կառավարությունը չի տրամադրում վարկեր, պետպատվերն ընդհանրապես չի գործում:
Ուսանողական միության վարչության անդամ Մհեր Ղազարյանն էլ դժգոհեց, որ իշխանությունները կրթական փոփոխությունների մասին միայն տեսականորեն են խոսում. «Ոլորտի բարեփոխումներ ասելով միայն վարձավճարների բարձրացումն են հասկանում, բայց մասնագետների փոփոխություն բուհերի ներսում գրեթե չի լինում: Համալսարան են ընդունում այնպիսի կադրեր, որոնց համապատասխան գիտելիքներն ու որակավորումները չունեն»
Արփինե ՍԻՄՈՆՅԱՆ
