«Ազատություն» ռադիոկայան. Թուրքիայի վարչապետի համոզմամբ՝ բանակցային լուծման ժամանակն անցել է և հարկ է ուժի դիմել։
Թուրքիայի վարչապետ Ռեջեփ Էրդողանը հաջորդ շաբաթ մեկնում է Ռուսաստան, որտեղ մասնակցելու է Սանկտ Պետերբուրգի Կոնստանտինովյան պալատում սեպտեմբերի 5-6-ը նախատեսված «Մեծ քսանի» երկրների գագաթնաժողովին։
CNN Turk հեռուստակայանի հաղորդագրության համաձայն, Էրդողանը խստորեն քննադատել է ՄԱԿ-ին Սիրիայի հարցում գործնական քայլերի չդիմելու համար։ Նա ասել է, որ Սիրիայում քաղաքացիական բնակչության շրջանում զոհվել է ավելի քան 100 հազար մարդ։
Թուրքիայի վարչապետի խոսքերով՝ հարկ եղած դեպքում միջազգային համայնքը կարող է գործել առանց ՄԱԿ-ի Անվտանգության խորհրդի բանաձևի, ինչի համար պետք է «կամքի կոալիցիա կազմել»։
Կարդացեք նաև
Ավելի վաղ Էրդողանը անուղղակի քննադատել է Ռուսաստանին և Չինաստանին՝ ՄԱԿ-ի Անվտանգության խորհրդում Սիրիայի հարցով բանաձևը վետոյի ենթարկելու դիրքորոշման համար։
Թուրքիայի վարչապետն ասել է, որ իր երկիրը պատրաստ է մասնակցել Սիրիայի դեմ ուղղված միջազգային գործողության` նույնիսկ ՄԱԿ-ի Անվտանգության խորհրդի հավանության բացակայության պարագայում։ Ընդ որում, Էրդողանի համոզմամբ, սահմանափակ միջամտությունն արդյունավետ չի լինի, անհրաժեշտ է լայնածավալ վճռական գործողություն, որի արդյունքում նախագահ Բաշար ալ-Ասադի վարչակարգը կտապալվի։
Էրդողանի խոսքերով, ինքը մտադիր է Սանկտ Պետերբուրգում Սիրիայի հարցը քննարկել Միացյալ Նահանգների և Ռուսաստանի նախագահներ Բարաք Օբամայի և Վլադիմիր Պուտինի հետ։
REX լրատվական կայքը վկայակոչել է ռուսաստանցի պատմաբան, Մերձավոր Արևելքի և Կովկասի հարցերն ուսումնասիրող քաղաքական վերլուծաբան Ստանիսլավ Տարասովին, որի համոզմամբ՝ Էրդողանը, փաստորեն, «անկյուն է մղում» Օբամային՝ դրդելով նրան օր առաջ սկսել արշավը։
«Էրդողանի հայտարարությունների մեջ կան շատ լուրջ ակնարկներ։ Սերբիայի դեմ ՆԱՏՕ-ի արշավն իրականացվել է առանց ՄԱԿ-ի Անվտանգության խորհրդի հավանության։ Դրանից հետո իրականացվել է Մարթի Ահթիսարիի ծրագիրը, որը հանգեցրել է Կոսովոյի անկախությանը», – ասել է Տարասովը՝ ավելացնելով, որ իր կարծիքով, Էրդողանի նպատակը Սիրիայի մասնատումն է էթնիկ, կրոնական և շրջանային սկզբունքներով։
Առանց ՄԱԿ-ի թույլտվության է իրագործվել նաև ներխուժումն Իրաք, որի հետևանքով Թուրքիան իր սահմանների մոտ հսկողության տակ է վերցրել Իրաքի տարածքի որոշ հատվածներ։
Տարասովի համոզմամբ՝ պաշտոնական Անկարային նաև նյարդայնացնում է Սիրիայի հարցով Ժնևում խորհրդակցություն հրավիրելու տարբերակը։ Թուրքերն ասում են, թե բանակցային լուծումների ժամանակն արդեն անցել է և հարցը կարելի է լուծել միայն ուժի միջոցով։
Արմեն Քոլոյան
