Լեռնային Ղարաբաղի Հանրապետություն կատարած աշխատանքային այցի առաջին օրը վարչապետ Տիգրան Սարգսյանը հանդիպել է Արցախի նախագահ Բակո Սահակյանին: Տիգրան Սարգսյանը նախ շնորհավորել է Բակո Սահակյանին` Արցախի Հանրապետության անկախության հերթական տարեդարձի կապակցությամբ` ընդգծելով, որ Հայաստանը շարունակելու է ակտիվ միջոցներ ձեռնարկել Արցախի հետագա զարգացման ուղղությամբ ` նպաստելով նաև միջազգային ներդրումների ներգրավմանը:
Կարևորելով երկու հայկական հանրապետությունների փոխգործակցության շարունակական զարգացումը` Հայաստանի վարչապետը և ԼՂՀ-ի նախագահն ընդգծել են բարեփոխումների իրականացման շուրջ երկկողմ համագործակցության սերտացումն ու ընդլայնումը:
Այդ համատեքստում, զրուցակիցներն անդրադարձել են կենսաթոշակային ոլորտում, առողջապահության, տրանսպորտի, գյուղատնտեսության, արդյունաբերության, կրթության բնագավառներում համատեղ ծրագրերին առնչվող մի շարք հարցերի:
Կարդացեք նաև
Լրագրողների հետ զրույցում վարչապետ Սարգսյանը կարևորել է այսպիսի հանդիպումների անցկացումը, որոնք հնարավորություն են տալիս հստակեցնել համատեղ կատարված աշխատանքների ընթացքն ու նախանշել նոր ծրագրեր: Կառավարության ղեկավարը հատկապես կարևորել է կենսաթոշակային ոլորտում բարեփոխումների համատեղ իրականացումը, օրենսդրական դաշտի բարելավման ուղղությամբ տարվող աշխատանքները:
«Միևնույն ժամանակ, հետաքրքիր է տեղում ծանոթանալ Լեռնային Ղարաբաղում հաջողությամբ իրականացված ծրագրերին, որովհետև մեր քաղաքական սկզբունքը միշտ եղել է հետևյալը. տնտեսական զարգացումները Լեռնային Ղարաբաղում պետք է լինեն առաջանցիկ, քանի որ ակնհայտ է, որ այսօր Լեռնային Ղարաբաղում է որոշվում մեր ազգի ապագան: Մեր հաղթանակները պետք է ամրապնդվեն տնտեսական ոլորտում»,- ասել է Տիգրան Սարգսյանը:
Խոսելով Լեռնային Ղարաբաղի Հանրապետության անկախության հերթական տարեդարձի խորհրդի մասին` վարչապետը նշել է. «Դա ոչ միայն ԼՂՀ–ի, այլև ողջ հայության տոնն է, որովհետև մենք 21-րդ դարում հպարտությամբ նայում ենք դեպի ապագան` տոնելով մեծ հաղթանակ, որն արձանագրեցինք` հռչակելով Լեռնային Ղարաբաղի Հանրապետության անկախությունը»:
Կառավարության ղեկավարի աշխատանքային այցը ԼՂՀ շարունակվում է:
ՀՀ կառավարություն
