Այսօր Գյումրու Թատերական հրապարակում հանրային ժողով հրավիրած Րաֆֆի Հովհաննիսյանը անդրադարձավ նաև Հայաստանի արտաքին քաղաքական հարցերին:
Անդրադառնալով նոյեմբերի 29-ին Վիլնյուսում կայանալիք Արևելյան գործընկերության գագաթաժողովին Ասոցացման համաձայնագրի նախաստորագրմանը, «Ժառանգության» առաջնորդն ասաց. «Գյուլը ասում է, թուրքալեզու ժողովուրդների ժողովը անենք Ստեփանակերտում, Եվրոպան, Ամերիկան պնդում են նախաստորագրման վրա, Ռուսաստանը` ռազմավարական գործընկերը, ռազմավարական զինատեսակներ է վաճառում ռազմավարական հակառակորդ Ադրբեջանին, և Հայաստանը, մեջտեղը նստած, տարբեր ակոսները` մեկը ազատամարտիկ, մեկը ուսման վարձ ունեցող երիտասարդ, մեկը` բանվորական արդարության համար, մյուսը` բնակարանաշինական արդարության համար պայքարում են առանձին-առանձին: Սրանից մենք պարտված ենք դուրս գալու, եթե մի բան շուտ չփոխենք: Իմ կարծիքով մինչև նոյեմբեր սպասվում է շատ կարևոր որոշում, ինքս ես ու «Ժառանգություն»-ը կողմնակից ենք Եվրոպական միության անդամակցության, եթե Եվրոպան ճանաչի Հայաստանի ազգային շահը և ժողովրդի քաղաքացիական իրավունքը:
Ավելի շոշափելի, ավելի կոնկրետ. ես կարծում եմ, որ նախաստորագրման զուգահեռ կամ դրանից առաջ Հայաստանի Հանրապետությունը պետք է ճանաչի Լեռնային Ղարաբաղի հանրապետության ինքնիշխանությունը և տարածքային ամբողջականությունը, որպեսզի որևէ կասկած չլինի, թե այդ ասոցացման պայմանագիրը ինչին է վերաբերում: Ես ինքս ծանոթ չեմ տեքստին և շատ կասկածելի է, թե ինչու գործող իշխանությունները չեն հրապարակում այդ համաձայնագիրը: Բայց ներկա ընտրությամբ, ով չի հարգում Հայաստանի ժողովրդի քվեն, ով չի հարգում Հայաստանի ազգային շահը` նաև Արցախի պահով, իմ կարծիքով, չպիտի ունենա Հայաստանի ստորագրությունը: Ես հակված եմ, եթե այդ հարգանքը լինի Հայաստանի նկատմամբ, ով հարգեց Հայաստանը այդ ճանապարհով, ուրեմն ինքը պետք է ունենա Հայաստանի հարգանքը»,- հայտարարեց Րաֆֆի Հովհաննիսյանը:
Կարդացեք նաև
Նունե ԱՐԵՎՇԱՏՅԱՆ
