Երևանի դպրոցների ուսուցիչների օգոստոսյան կոնֆերանսում Ստ Զորյանի անվան 56 դպրոցի տնօրեն Սուսաննա Գալստյանը խոսելով կրթության որակի ապահովման մասին՝ շեշտեց հատկապես դրան խանգարող դասագրքերի անկատարությունը: Նշեց, որ դպրոցների համար անգնահատելի են ուսուցիչների վերապատրասումն ու ատեստավորումը, չնայած ուսուցիչները հաճախ դժգոհում են նաեւ դրանց բովանդակությունից:
171 դպրոցի տնօրեն Արամ Սաֆարյանն էլ խոսեց պետության կողմից տարվող կրթական քաղաքականության եւ առկա իրականության մասին: Փաստեց, որ այսօրվա դպրոցում աշխատանքների կազմակերպումը իրականացվում է տնօրենի կողմից. տանելով կազմակերպչի դեր, տնօրենը ստիպված է համատեղել կառավարման, ֆինանսական, մարդկային, կադրային քաղաքականություն վարելու եւ այլ որակներ, սակայն, նրա խոսքով, այդ ամենը համատեղելու համար նախ հարկավոր է կատարյալ օրենք, որտեղ չլինեն իրարամերժություններ:
Սաֆարյանի կարծիքով, ուսուցիչը պետք է ծանրաբեռնված լինի առնվազն մեկ դրույքով, նաեւ պետք է ասպարեզ բացվի հանրակրթության ոլորտում գիտական հետազոտությունների համար, պետք է առաջ քաշվեն ուսուցիչներին խրախուսելու աստիճաններ: «Մեծն հեռուստատեսությունը ուսուցչին փնովելուց բացի նաեւ պետք է ներկայացնի նրա անձնվեր աշխատանքը»,-ասաց նա:
Տնօրենը շեշտեց, որ դպրոցում այսօր շարունակում է գործել զանգվածային կրթություն ապահովելու մեթոդը, փոխանակ յուրաքանչյուր երեխայի հանդեպ անհատական վերաբերմունք ցուցաբերվի: Արամ Սաֆարյանի՝ կառուցողական առաջարկներով ելույթն անընդհատ ընդմիջվում էր մանկավարժերի ողջունող ծափերով:
Կարդացեք նաև
ԿԳ փոխնախարար Մանուկ Մկրտչյանը ժպտալով հիշեց, որ մի հավաքի ժամանակ դպրոցների տնօրեններն իրեն մի լավ խեղճացրել են, եւ այսօր շատ մեծ պատասխանատվությամբ է ելույթ ունենում: Դահլիճում նստած տնօրեններին նայելով՝ նա ասաց. «Առաջարկում եմ՝ հանդգնեք, լինեք առաջատար դպրոցներ, առաջարկում եմ դուք ինձ ղեկավարեք, առաջարկություններ արեք, եւ այդպիսով կստացվի իմ ելույթը»:
Փոխնախարարի հաջորդ առաջարկը ավելի ոգեւորեց տնօրեններին. «Այն տնօրենները, որոնք զգալիորեն ապահովել են բարձր ուսուցման որակ, նրանց հանդեպ լինել ավելի ներողամիտ, եթե ինչ-ինչ խախտումներ են եղել»:
Նա համաձայն չէ, որ կրթական գործընթացում վատ դասագիրքը վճռորոշ է: Մանուկ Մկրտչյանի ասելով՝ լավ ուսուցիչը երբեք չի նայում դասագրքերին. «Ստացվում է, որ դասագրքերին տեղ ենք տալիս վատ, գորշ ուսուցիչների համար»:
Երբ ուսուցիչները փոխնախարարի որոշ մտքերի հետ չհամաձայնեցին, Մանուկ Մկրտչյանը «ընդդիմացավ». «Քառասուն տարին մեկ է ստացվում, որ ես ինձ հակասեմ, օրինակ` դա եղել է իմ ամուսնանալուց»:
Մանուկ Մկրտչյանը տնօրեններից պահանջեց դրույքները չկիսել, ասաց, որ տնօրենների կողմից մանկավարժներին արվող նման թվացյալ բարությունը վնաս է դպրոցին: Նրա համոզմամբ, միեւնույն է կես դրույքի համար ստացվող աշխատավարձը էական չէ:
Գոհար ՀԱԿՈԲՅԱՆ
