«Ազատագրենք հուշարձանը օլիգարխի ձեռքից» նախաձեռնող խմբի անդամները «Փակ շուկայի» սեփականատեր, ԱԺ պատգամավոր Սամվել Ալեքսանյանին զգուշացնում են, եթե չկատարի իրենց պահանջները, իրենք ամեն ինչ կանեն` նրան սեփականության իրավունքից զրկելու համար:
Այսօր «Փակ շուկայի» տարածքում կազմակերպված ասուլիսի ժամանակ խմբի անդամ Գարեգին Չուգասզյանը դժգոհեց. «Մոտ երկու տարի կատարվում է պատմական հուշարձանի բարբարոսական ավերումը: Այս հուշարձանն ընդգրկված է համապետական հուշարձանների ցանկում: Քաղաքացիական հանրությունը բազմաթիվ անգամներ է ահազանգել, սեփականատերը երկու անգամ տուգանվել է, բայց դրանից հետո գիտակցաբար շարունակել է ավերումը: Չգիտեինք` ինչ է ներսում կատարվում, բայց երեկ հրապարակվեցին լուսանկարներ, եւ տեսանք, որ արտաքին ակնհայտ խաթարումներից բացի, հուշարձանը լուրջ խաթարման է ենթարկվել նաեւ ներսից: Հուշարձանն այժմ այնպիսի վիճակում է, որ պետք է անհապաղ պահանջենք վնասի փոխհատուցում եւ ոչ թե պետությունից, այլ շինարարությունը իրականացնողից:
Պայքարը միշտ եղել է, բազմաթիվ անգամներ բողոքի ակցիաներ են եղել, բայց եկել է մի փուլ, երբ հասարակությունն իր ձեռքն է վերցնում այս հուշարձանի ազատագրումը: Մենք ազատագրելու ենք հուշարձանը օլիգարխից, իսկ օլիգարխին` այս հուշարձանից, որովհետեւ իր համար մեծ պարտականություն է նման ծանրություն կրելը եւ ցանկանում է օր առաջ ազատվել այս ծանրությունից»:
Պարոն Չուգասզյանն ասաց, որ նախաձեռնող խումբը իր առջեւ երեք նպատակ է դրել.
Կարդացեք նաև
«Շուկայի սեփականատիրոջը ենթարկել պատասխանատվության, հարկադրել փոխհատուցել վնասը, վերականգնել նախկին տեսքը` ապամոնտաժել ապօրինի շինությունները: Դադարեցնել հուշարձանի նկատմամբ սեփականատիրոջ օգտագործման իրավունքը եւ դրա տարածքում արգելել որեւէ տնտեսական գործունեություն` մինչեւ նշված օրենքի պահանջների կատարումն ու հուշարձանի նախկին վիճակի վերականգնումը: Իսկ վերը նշված պահանջները չկատարելու դեպքում՝ իրավական միջոցներով սեփականատիրոջը զրկել սեփականության իրավունքից: Սեփականատիրոջը զգուշացնում ենք, որ մեր պահանջները ուշադրության չդարձնելու դեպքում, իրեն կզրկեն սեփականության իրավունքից»:
Հարցին, թե ներսի կամարները, երեկ տարածված լուսանկարների համաձայն, այլեւս չկան, այդ դեպքում հնարավո՞ր է վերականգնել հուշարձանի նախկին տեսքը, պարոն Չուգասզյանն ասաց. «Մենք այն ժողովուրդն ենք, որ Գառնու տաճարն ենք վերականգնել, այս հուշարձանը, որը դեռ կանգուն է, կարելի է վերականգնել»:
Նա ասաց, որ նախաձեռնող խումբը պատրաստվում է օրենքով չարգելված բոլոր միջոցներին դիմել` կկիրառվեն քաղաքացիական անհնազանդության բոլոր մեթոդները` պիկետներ, բողոքի ակցիաներ. «Բողոքներն արդեն իսկ սկսվում են: Վաղվանից Հայաստանը լինելով ԵԽ նախագահող երկիր, համաեվրոպական ժառանգության օրեր են անցնելու, Հայաստանն էլ բացելու է այդ միջոցառումը: 20 միլիոն եվրոպացի մասնակցելու է այդ միջոցառմանը, միջոցառումը նախատեսել է այցելություններ հուշարձաններ: Մենք հրավիրելու ենք այդ հյուրերին` այս հուշարձանի դիտմանը»
Արփինե ՍԻՄՈՆՅԱՆ
Տո, լավ էլ անելու են, ափսոս էր Փակ շուկան