Տուժողի նամակը՝ Հայաստանի իրավաբաններին, փաստաբաններին, համալսարանի իրավաբանականի դասախոսներին
Հարգելի պարոնայք։
Որպես հանրապետության իրավական համակարգը կարգավորող, հսկող եւ իրագործող մասնագետներ, դիմում եւ խնդում եմ Ձեզ՝ մեկ բառով «այո» կամ «ոչ» պատասխան ստանալու ակնկալիքով:
1. Արդյոք քրեական գործով դատարանի օրինական ուժի մեջ մտած դատավճռով հաստատված հանգամանքը, գործարքների կեղծ լինելու վերաբերյալ, կարո՞ղ է հիմք հանդիսանալ նույն առարկայի վերաբերյալ քաղաքացիական գործերով օրինական ուժի մեջ մտած դատական ակտերը բեկանելու համար՝ նոր երեւան եկած հանգամանքի հիմքով։
2. Արդյոք հնարավո՞ր է քրեական գործով կայացված դատավճիռը, նույն գործով, նմանատիպ փաստական հանգամանքերով տուժողներից մեկի քաղաքացիական գործի համար համարվի որպես նոր երեւան եկած հանգամանք եւ հանդիսանա գործի բեկանման հիմք, իսկ նույն գործով մյուս տուժողի համար քաղաքացիական գործը բեկանելու համար չհամարվի որպես նոր երեւան եկած հանգամանք։
«Այո» պատասխանի դեպքում հասկանալի է, որ համապատասխան վերաբերմունք պետք է ցուցաբերեն վերադաս քաղաքացիական դատարանները, իսկ «ոչ» պատասխանի դեպքում՝ կարծում եմ, պետք է 7 տարի տեւած եւ 2 տարի առաջ օրինական ուժի մեջ մտած դատավճիռը բեկանվի եւ 9 տարի ազատազրկման դատապարտված խարդախին պետք է արդարացնել եւ անհապաղ ազատ արձակել։
Ձեր պատասխանը կլինի «լակմուսի թուղթ» մեր արդարադատության մասին եւ հնարավոր է՝ կսթափեցնի իրավաբանական աճպարարություններ կատարողներին։
ԺՈՐԱ ԷԼԲԱԿՅԱՆ
Թիվ ԵՔՐԴ-0059/01/08 քրեական զործով տուժող
եւ 11 տարի արդարություն փնտրող
ՀՀ քաղաքացի
«Առավոտ» օրաթերթ
