Այսօր «Հայելի» ակումբում կայացած ասուլիսին պատասխանելով հարցին՝ դուք մասնակցե՞լ եք Արարատ Զուրաբյանի ծնունդին, վարչապետ Տիգրան Սարգսյանը թամադայություն է արել այդ խնջույքին, եւ արդյոք նա՞ է ֆինանսավորում ՀՀՇ-ն, ՀՀՇ անդամ Հովհաննես Իգիթյանը պատասխանեց. «Ես Հայաստանում չեմ եղել, եթե լինեի, ապա կլինեի առաջին շարքերում, հաճույքով կնշեի իմ ընկերոջ 50 ամյակը, կփորձեի ինչ որ ձեւով ուրախություն մտցնել: Մյուս հարցին էլ հարցով պատասխանեմ, վատ՞ է, որ վարչապետը մասնակցել է: Ինձ թվում է դա վերջին տարում վարչապետի ամենահամարձակ քայլերից է եղել: Ես ողջունում եմ, չգիտեմ ովքեր են այնտեղ եղել, բայց կարծում եմ այդ ծնունդին չեն մասնակցել այն մարդիկ, որոնք Արարատ Զուրաբյանի հետ երկար ճանապարհ են անցել եւ իրենց ընկեր էին համարում, սակայն ինչ-ինչ ներքին հայտարարության պատճառով այդ մարդիկ մի օր Արարատ Զուրաբյանին համարեցին թշնամի: Ես մամուլից գիտեմ, որ վարչապետը մասնակցել է Արարատ Զուրաբյանի ծնունդին, լավ է արել, խմել է նրա կենացը: Եթե ինքը «Bentley» նվիրեր Արարատ Զուրաբյանին, ես կդատապարտեի, եթե ֆինանսավորեր այդ խնջույքը, էլի կդատապարտեի, բայց նման բաներ չեն եղել: ՀՀՇ-ին էլ չի ֆինանսավորելու ոչ վարչապետը, ոչ էլ այն մարդը, ով ֆինանսավորում է այլ ընդդիմադիր ուժերին»:
Եվա ՀԱԿՈԲՅԱՆ
