Վարորդների իրավունքների պաշտպան, «Քաղաքացիական դիրքորոշում» հ/կ նախագահ Գեւորգ Դոստուրյանը երեկ հանդիպել է տրանսպորտի եւ կապի փոխնախարարին, նրան վստահեցրել են` առաջիկա երկու ամիսներին տաքսիստների խնդիրները լուծվելու են:
«Բողոքում էինք անօրինական տաքսիների գրդոնի ահավոր չափերից, ասացինք՝ այս պատճառով ենք նախատեսել առաջիկայում ակցիա կազմակերպել: Փոխնախարարն ընդունեց, որ անօրինական տաքսիների թիվը մեծացել է, ասաց կապված է մի բանի հետ, որ վերահսկողությունը լավ մակարդակով չի կատարվում: Նա նաեւ ասաց, որ ամեն ինչ կանեն, որ սեպտեմբերին ընդունվի լիցենզավորման նոր կարգի մասին օրենսդրական նախաձեռնությունը, ասաց` երկու ամիս հետո անօրինական տաքսիների հարցը կվերանա: Ասաց` իրենք էլ են անհանգստացած, ընդունում են, որ այդ խնդիրը կա եւ հետեւողական կաշխատեն»,- այսօր «Նոյյան տապան» ակումբում պատմեց պարոն Դոստուրյանը:
Պարոն Դոստուրյանի ղեկավարած տաքսիստների շարժումը էլ չի պահանջում դեղին համարանիշի վրա ծախսած գումարների փոխհատուցում. «Մարդիկ ասում են` հավասարություն լինի, դաշտը գոնե 95 տոկոսով օրինականացվի, պատրաստ ենք մոռանալ նույնիսկ էս 17 հազար դրամը»:
Ներկայումս տաքսի սպասարկման ոլորտում, ըստ պարոն Դոստուրյանի, 8000 անօրինական տաքսի ծառայություն կա, նույնքանն էլ` օրինական:
Կարդացեք նաև
Պարոն Դոստուրյանի խոսքերով, դաշտը վերահսկելու է տրանսպորտի տեսչությունը:
Արփինե ՍԻՄՈՆՅԱՆ
