Այսօր «Հայացք» ակումբում ոստիկանության օպերլիազորներ Արտակ Բարսեղյանի եւ Խաչիկ Բախբուդարյանի պաշտպաններ Լիպարիտ Սիմոնյանը եւ Արայիկ Ալվանդյանը խոսեցին Արտակ Բարսեղյանի եւ Խաչիկ Բախբուդարյանի դեմ ակնհայտ անհիմն առաջադրված մեղադրանքից, ինչը, ըստ նրանց, չի համապատասխանում իրավական որոշակիության սկզբունքին:
Սիմոնյանի խոսքով` Արտակը եւ Խաչիկը աշխատել են որպես օպերլիազորներ եւ բերման են ենթարկել գողության մեջ կասկածվող անձանց, նրանց մեղադրանք է առաջադրվել պաշտոնական կեղծիք կատարելու եւ լիազորություններից անցնելու համար: Այս գործի շրջանակներում հարցաքննված բոլոր անձինք հաստատեցին, որ դեպքը տեղի է ունեցել 2012 թվականի հոկտեմբերի չորսին:
Սիմոնյանը համեմատելով Կոմիտաս 5 հասցեում տիրող իրավիճակում ոստիկանների գործողություններն իր պաշտպանյալների գործողությունների հետ` նշեց. «Պետությունը իրենց բարեհաճ ոստիկանության գործողությունները դիտում է իրավաչափ, իսկ իմ պաշտպանյալներինը` ոչ իրավաչափ»:
Ալվանդյանն էլ ավելացրեց, որ այսօր դատապարտում են երկու երիտասարդի, որոնք լավագույն աշխատողներն են եղել, սակայն իրենց՝ օրենքով սահմանված լիազորության շրջանակներում իրականացրած գործողությունների արդյունքում գտնվում են մեկուսարանում:
Կարդացեք նաև
Սիմոնյանի խոսքով, այսօր հավատում են յոթ անգամ դատապարտված հանցագործին, եւ ոչ թե ոստիկանին, ցույց տալու համար, թե`«Տեսեք, մենք ոստիկաններին էլ ենք դատում»:
Պաշտպանները նշեցին, որ այս գործով իրենք դիմել են մինչեւ վճռաբեկ դատարան՝ կալանքը գրավով փոխարինելու համար, սակայն միայն մերժումներ են ստացել:
Եվա ՀԱԿՈԲՅԱՆ
