ՀՀ առողջապահության նախարարության գլխավոր թոքաբան Անդրանիկ Ոսկանյանն այսօր «Տեսակետ» մամուլի ակումբում լրագրողների հետ հանդիպման ժամանակ ներկայացնում էր մրսածության հիմնական պատճառները եւ դրա հնարավոր հետեւանքները:
Թոքաբանի պնդմամբ, մրսածությունը կարող է ունենալ շատ լուրջ հետեւանքներ. «Սովորական մարդը մրսածություն ասելով պատկերացնում է շնչառական ուղիների հիվանդություն, սակայն դա այսպես չէ»:
Անդրանիկ Ոսկանյանն ասում է, որ մրսածության հիմնական պատճառ կարող են հանդիսանալ միջանցիկ քամիները կամ օդի հոսքը. «Այստեղ կա հակասություն: Մարդու համար այդ օդի հոսքը միշտ հաճելի է, սակայն չի պատկերացնում, թե ինչ լուրջ խնդիրներ դա կարող է առաջացնել»:
Թոքաբանի խոսքերով, ֆիզիկայի օրենքները տարածվում են նաեւ բոլոր մարդկանց վրա: Եթե դրսում օդի ջերմաստիճանը 32 աստիճան է, ապա մարդու մարմնի ջերմաստիճանն ավելի բարձր է. «Քամու հոսքը մարդու մարմնին տալիս է սառնության զգացում, այսպիսով՝ դառնալով մի քանի պրոբլեմների առիթ»: Այս դեպքում մարդու երակները կծկվում են, արյունը սկսում է քիչ գալ եւ իմունային համակարգի հնարավորությունները փոքրանում են՝ առաջացնելով բորբոքումներ:
Կարդացեք նաև
Պարոն Ոսկանյանի կարծիքով, նման բորբոքումներ ավելի շատ լինում են ավելի թույլ, տկար, ավելի շատ ալկոհոլ եւ ծխախոտ օգտագործող անձանց մոտ:
Նա խորհուրդ է տալիս նման հիվանդություններից խուսափելու համար զբաղվել լողով եւ ավելի հաճախ մեկնել քաղաքից դուրս:
Սխալ է համարում այն փաստը, որ ցանկացած տիպի մրսածության դեպքում պետք է օգտագործել դեղորայք. «Չպետք է միանգամից գնել այն միջոցները, որոնք գովազդվում են հեռուստացույցով եւ ընդունել դրանք: Եթե ջերմությունը 38 աստիճանից չի բարձրանում, ապա պետք է սպասել մի քանի օր, այն կիջնի: Չիջնելու դեպքում արդեն պետք է դիմել բժշկի, որն էլ կնշանակի դեղորայքը»:
Օֆելյա ՀՈՎՀԱՆՆԻՍՅԱՆ
