Բուդաղյանների փաստաբան Հայկ Ալումյանն այսօր «Հայելի» ակումբում անդրադարձավ ՀՀ գլխավոր դատախազին հասցեագրված իր նամակին: Նա հետաքրքրվել էր դատախազից՝ կայացվե՞լ են դատավարական որոշումներ՝ կապված ԶԼՄ-ների հրապարակումների հետ, որոնցում Սուրիկ Խաչատրյանի անունը կապվում էր հանցագործությունների հետ:
Հայկ Ալումյանի պատմելով՝ «Սկզբում դատախազությունը տարօրինակ պատասխան է ուղարկել՝ ի՞նչ հրապարակումների մասին է խոսքը: Ես ուղարկեցի մեծ կապոցով հրապարակումներ: Դատախազությունն ի պատասխան՝ դա վերահասցեագրեց ՀՔԾ-ին, որն էլ վերջերս պատասխանեց, որ հրապարակումներում նշված փաստերի վերաբերյալ նախկինում քրգործեր արդեն իսկ հարուցված եղել են: Չնշվեց, թե որ հրապարակումների վերաբերյալ եւ ինչ ընթացք է դա ստացել»:
Անդրադառնալով տեսանյութի մոնտաժված կամ չմոնտաժված լինելուն՝ նա ասաց, որ փորձաքննությունը ցույց տվեց, որ քննիչի մոտ եղած օրինակը կեղծված չէ. «Հիմա արդեն այդ տեսանյութը մեզ բավականին մեծ նյութ է տալիս որոշակի հետեւություններ անելու համար: Մենք նոր փաստեր կարողացանք դրանից քաղել: Կարող են օգտվել առիթից եւ փորձեն շահարկել, որ նախաքննական գաղտնիք ենք հրապարակում եւ փորձեն պաշտպանին հեռացնել, դրա համար ես մի քիչ ավելի զգույշ եմ»:
Հայկ Ալումյանի խոսքերով՝ սատանան մանրուքների մեջ է թաքնված. «Նույնիսկ եթե մոնտաժված տեսանյութը նայենք, կերեւա, որ Սուրիկ Խաչատրյանի տան մոտ, բայց ոչ իր տան մեջ, տան տարածքում՝ Դավիթ -Բեկ փողոցում, երբ Ավետիք Բուդաղյանի մեքենան կանգնում է, նա մեքենայից դուրս չի գալիս: Բայց մի խումբ մարդիկ մոտենում են, ավտոմեքենայի դուռը բացում են եւ սկսում են քաշքշել նրան: Չմոնտաժված տարբերակում երեւում են նաեւ նրանց զենքերը: Դեռ Արտակ Բուդաղյանը մեքենայից դուրս չեկած՝ արագ մոտենում են նրա մեքենային եւ ագրեսիվ ձեւով: Առաջին երեք կրակոցը հնչում է այն ժամանակ, երբ միջադեպն, ըստ էության, արդեն ավարտվել էր, արդեն եղբայրները հեռացել էին այդտեղից, արդեն չկար իրարանցում եւ չկային փոխադարձ գործողություններ»:
Կարդացեք նաև
Նա վստահեցրեց, որ եթե հանրությունը չմոնտաժված տեսանյութը նայի, այլեւս հարցեր չեն առաջանա. «Այստեղ մի հարց է առաջանում՝ ո՞վ է կեղծել եւ ով է տրամադրել այդ տեսանյութը՝ կեղծելու համար, որովհետեւ այդ տեսանյութը առաջին հերթին առգրավված է եղել, չէ՞: Ո՞վ է դա պատվիրել, որտեղի՞ց են այդ տեսանյութը ձեռք բերել՝ հարց է»:
Հռիփսիմե ՋԵԲԵՋՅԱՆ
