Մեզ հասած տեղեկություններով՝ երեկ երեկոյան Կապանի համար 3 դպրոցում թմրանյութերի օգտագործման դեպք է հայտնաբերվել: Դպրոցի տնօրեն Էդիկ Բեգլարյանից փորձեցինք ճշտել կատարվածի իսկությունը: Վերջինս փոխանցեց, որ իրեն երեկ երեկոյան ժամը 21:30-22:00-ի սահմաններում ոստիկանությունից զանգահարել են, գնացել է դպրոց եւ տեսել, որ դպրոցի պահակին եւ երկու անծանոթ տղամարդու դպրոցից բաժին են տանում:
«Ինձ ոստիկանությունից են զանգահարել, որ նման դեպք կա: Իջել եմ՝ արդեն տանում էին նրանց: Թե ինչպե՞ս է եղել՝ ինձ բան չեն ասել: Միայն ասացին, որ դպրոցում նարկոտիկ էին ուզում օգտագործել, թե ինչ, դրա համար են տանում, ընդ որում՝ մյուս երկուսն անծանոթ տղամարդիկ էին:
Երեկ ժամը 4-ին տնտեսվարը պահակին հանձնել է բանալին, սովորաբար տուն գնալուց առաջ հանձնում-ընդունում է արվում, ես այդ ժամանակ դպրոցում էի: Դպրոցից 5:30-ին ենք դուրս եկել, իսկ պահակն էնտեղ նստած էր, ով 5-6 տարի է՝ որպես պահակ է աշխատում մեր դպրոցում:
Երեկոյան ժամը 10-ի սահմաններում զանգեցին ոստիկանությունից, թե սենց բան կա՝ գնացի դպրոց: Ինձ ասացին, որ պահակը տեղում չէր, իր ծանոթներին թողել էր դպրոցում, իսկ ինքը գնացել ձմերուկ-բան առնելու, թե ինչ, զանգել են՝ նոր եկել է: Թե պահակն ի՞նչ է ասել, ինչպե՞ս է բացատրել, ի՞նչ է եղել դպրոցում՝ չգիտեմ, ինձ չեն թողել իր հետ զրուցեմ, տեղյակ չեմ մանրամասներից», – ասաց դպրոցի տնօրեն Էդիկ Բեգլարյանը, որը հավաստիացրեց, թե իրենց դպրոցում մինչ օրս նման դեպք չէր եղել՝ հատկապես իր ղեկավարման ինը տարիների ընթացքում, նույնիսկ դպրոցում աշխատող տղամարդկանցից եւ ոչ մեկը ծխող չէ:
Կարդացեք նաև
«Մեզ համար անսովոր էր այս երեւույթը», – ավելացրեց տնօրենը եւ նշեց, որ դեպքի օրը պահակ Է. Թունյանին բաժին տանելուց հետո, մյուս պահակին են փոխարինելու կանչել, որպեսզի դպրոցն առանց հսկողության չմնա:
Մերի ՍՈՂՈՄՈՆՅԱՆ
