Նոյեմբերյան համայնքի ավագանու օգոստոսի 16-ի նիստում ավագանու անդամ Արթուր Անանյանը հայտարարեց, որ Նոյեմբերյանի բժշկական կենտրոնում պարբերաբար այրում են դեղամիջոցներ:
«Դեղերի այրվելուց հետո ծանր հոտով ամպ է գոյանում, որը խեղդում է», -ասաց բժշկական կենտրոնի հարեւանությամբ բնակվող Արթուր Անանյանը: Նրա խոսքով` բժշկական կենտրոնը հին դեղերն այրում է հիվանդանոցի նախկին, չգործող կաթսայատանը, որպեսզի այրումից արտանետվող գազերը հեռանան մթնոլորտ: Սակայն քամին քշում, տարածում է այրված դեղամիջոցներից գոյացած թունավոր ամպը: Նոյեմբերյանի քաղաքապետ Վանուշ Ամիրաղյանը ավագանու նիստում ասաց, որ բժշկական կենտրոնը իր տարածքում է կատարում դեղերի այրումը: Սակայն ավագանու անդամները հակադարձեցին, որ դեղերի ոչնչացումը հատուկ, մասնագիտացված գործունեություն է:
Այս խնդիրների կապակցությամբ զանգահարեցինք Նոյեմբերյանի բժշկական կենտրոն: Կենտրոնի տնօրեն Աշոտ Գյոզալյանը գտնվում է արձակուրդում: Բժշկական կենտրոնից ասացին, որ հին կաթսայատանն այրվում են բժշկական կենտրոնում գործող դիալեզի միկրոբաժանմունքում օգտագործված պլաստմասսե խողովակները: Նաեւ հայտնեցին, որ վիրահատություններից հետո առաջացող մնացուկները դեն են նետվում հիվանդանոցից հեռացվող կենցաղային աղբի հետ:
Նոյեմբերյանի բժշկական կենտրոնի դիահերձարանում չկա մշտական հոսող ջուր, սառնարան : Նախկինում տեղեկացրել ենք, որ Նոյեմբերյանի բժշկական կենտրոնի մուտքի մոտ տեղակայված է սգո պարագաներով վագոն-տնակ:
Կարդացեք նաև
Ոսկան ՍԱՐԳՍՅԱՆ
