Ծաղկաձորի գլխավոր մարզահամալիրի Հոկսեն Միրզոյանի անվան ծանրամարտի դահլիճում այս օրերին Հայաստանի ծանրամարտի տղամարդկանց հավաքականը նախապատրաստվում է երկու կարեւորագույն մեկնարկի:
Գլխավոր մարզիչ Պողոս Պողոսյանն Aravot.am-ին տեղեկացրեց, որ սեպտեմբերին կայանալու է մինչեւ 23 տարեկանների Եվրոպայի, իսկ հոկտեմբերի կեսերին՝ մեծահասակների աշխարհի առաջնությունը: «Այս հավաքին հրավիրվել են այն ծանրորդները, որոնք գոհացնում են մարզիչներին: Նրանք են. 56 կգ՝ Սմբատ Մարգարյան,60 կգ՝ Վանիկ Ավետիսյան, 69 կգ՝ Առաքել Միրզոյան, 85 կգ՝ Աղասի Աղասյան եւ Տիգրան Կարապետյան, 94 կգ՝ Արամ Անդրիկյան, +105 կգ՝ Հրաչ Ղարիբյան, Հայկ Հակոբյան, Ռուբեն Ալեքսանյան: Այս ուսումնամարզական հավաքում տղաներն աշխատում են հիմնականում վարժությունների կատարման տեխնիկան հղկելու վրա: Օգոստոսի 30-ին կվերադառնանք Երեւան, եւս մի հավաք կանցկացնենք եւ Սմբատ Մարգարյանը, Հրաչ Ղարիբյանը, Գագիկ Գրիգորյանն ու Հայկ Հակոբյանը կմեկնեն Եվրոպայի առաջնություն: Իսկ Վանիկ Ավետիսյանը, Առաքել Միրզոյանը, Աղասի Աղասյանը, Տիգրան Կարապետյանը Արամ Անդրիկյան եւ Ռուբեն Ալեքսանյանը կշարունակեն նախապատրաստվել աշխարհի առաջնությանը», պատմեց Պողոս Պողոսյանը:
Աշոտ ՀԱԿՈԲՅԱՆ
