Ըստ «Դատալեքս» տեղեկատվական կայքի՝ Տավուշի մարզի Գոշ գյուղի բնակիչ, 1965թ. ծնված Գագիկ Արզումանյանը դիմել է Տավուշի մարզի առաջին ատյանի դատարան՝ մահացած ճանաչված քաղաքացու հայտնվելու հետեւանքով վճիռը վերացնելու պահանջով:
Գ. Արզումանյանը դատարանին հայտնել է,որ ինքը նախկին կնոջ՝ Զինա Բաբաջանյանի դիմումի համաձայն Տավուշի մարզի ընդհանուր իրավասության դատարանի 2008թ. դեկտեմբերի 22-ի վճռով ճանաչվել է մահացած: Դրանից 5 տարի առաջ Արզումանյանը մեկնել է Ռուսաստան, խզել կապերն ընտանիքի հետ, կորցրել անձնագիրը:
2013թ. մայիսի 23-ին նա ՌԴ-ում Հայաստանի դեսպանության Կրասնոդարի մարզի հյուպատոսությունից ստացել է ՀՀ վերադարձի վկայական եւ վերադարձել հայրենիք: Գ. Արզումանյանը նոր անձնագիր տրամադրելու խնդրանքով դիմել է ոստիկանության անձնագրերի եւ վիզաների վարչության Դիլիջանի անձնագրային խումբ: Նրան պատասխանել են, որ նոր անձնագիր չեն կարող տրամադրել, քանի որ ինքը դատարանի վճռով ճանաչվել է մահացած: Գ. Արզումանյանը դատարան է ներկայացրել զինվորական գրքույկը եւ վերադարձի վկայականը:
Գ. Արզումանյանը եւ դատարանում նրա ներկայացուցիչը դատարանին խնդրել են արագացված դատաքննությամբ բավարարել հայցը: Օգոստոսի 9-ին Տավուշի մարզի առաջին ատյանի ընդհանուր իրավասության դատարանի դատավոր Աշոտ Խաչիկյանը վճռել է Գ. Արզումանյանի դիմումը բավարարել եւ նրան մահացած ճանաչելու մասին Տավուշի մարզի ընդհանուր իրավասության դատարանի 2008թ. դեկտեմբերի 22-ի վճիռը վերացնել:
Կարդացեք նաև
Ոսկան ՍԱՐԳՍՅԱՆ
