2013թ. օգոստոսի 14-ին Միխայիլ Թալիբովն Ադրբեջանում դատապարտվել է մեկ տարվա ուղղիչ աշխատանքների նույն թվի մարտի 26-ին Ֆեյսբուքում մեկնաբանություն անելու համար: Դատավճռի համաձայն, Թալիբովը նաև պետք է հեռացներ Ֆեյսբուքում արած իր մեկնաբանությունները: Գրված է «Էմնեսթի Ինթերնեշընըլ» հայտարարությունում:
Առցանց զրպարտություն անելու համար Միխայիլ Թալիբովի քրեական գործն առաջինն է Ադրբեջանում «զրպարտություն» հոդվածի փոփոխությունից հետո: 2013թ. մայիսի 13-ին Ադրբեջանի խորհրդարանն ընդունեց օրենքի փոփոխություններ, ըստ որի քրեական հետապնդումը տարածվում է նաև ինտերնետով արված վիրավորանքի և զրպարտության վրա:
Սա ոչ միայն հակասում է զրպարտության մասին հոդվածը ապաքրեականացնելու կառավարության 2012թ. հանձնառությանը, որն ընդունվել է Մարդու իրավունքների մասին Գործողությունների ազգային ծրագրում, այլև 2013թ. նախագահական ընտրություններից առաջ բացասաբար է ազդում խոսքի ազատության վրա: Ասված է` հայտարարության մեջ` հիշեցնելով, որ ՄԱԿ-ի մարդու իրավունքների խորհուրդը կոչ է արել պետություններին ապաքրեականացնել զրպարտությունը` ընդգծելով, որ քրեական պատասխանատվության պետք է կանչել ամենալուրջ դեպքերում:
Կարդացեք նաև
Պատրաստեց Հովհաննես ԻՇԽԱՆՅԱՆԸ
