Ռուս լրագրող Դարյա Ասլամովան «Հաբերթուրք» թերթին տված հարցազրույցում պատմել է, որ Ղարաբաղյան պատերազմի ժամանակ իրեն բռնաբարել են ադրբեջանցիները:
Ըստ «Ինօ ՍՄԻ» լրատվականի թարգմանության, հարցին, թե Ասլամովան ունեցե՞լ է հարաբերություններ զինվորականների հետ, երբ նա եղել է ռազմական թղթակից, լրագրողը պատասխանել է. «Ղարաբաղյան հակամարտության ժամանակ, երբ ես 21 տարեկան էի ու աշխատում էի հայկական գյուղերից մեկում, ինձ առեւանգել էին ադրբեջանցի զինվորականները: Նրանք ուզում էին ինձ սպանել, իմ նկատմամբ սեռական բռնություն էին կիրառում: Ես երկար դիմադրում էի, ու վերջիվերջո կարողացա փրկել կյանքս»:
Թուրք լրագրողի մեկ այլ հարցին, թե Լեռնային Ղարաբաղի հարցում նա աջակցում է հայերին, Թուրքիայի սահմանի մոտ ուսումնասիրել է սիրիացիների խնդիրը, Գեզի զբոսայգու ցույցերի ժամանակ գնացել է Ստամբուլ` լուսաբանելու, արդյոք այդ ամենը չի հաստատում, որ Ասլամովան ռուս գործակալ է, որն աշխատում է Թուրքիայի դեմ, նա պատասխանել է. «Որևէ ապացույց չկա, որ ես գործակալ եմ: Բայց կան իմ հոդվածներն ու գրքերը: Այդ մեղադրանքն իրոք անհեթեթ է հնչում: Բայց, եթե ուզում են այդպես երևակայել, դա իրենց խնդիրն է»:
Թուրք լրագրողի հարցին, թե խոսակցություններ կան, որ Ասլամովան նաև հարաբերություններ է ունեցել քաղաքական գործիչների հետ, ռուս լրագրողն ասել է, որ դա 25 տարի առաջ էր, իսկ այժմ ինքը գրեթե տատիկ է: Սակայն թուրք լրագրողը պնդել է, որ Ասլամովան դեռ գրավիչ է և նույնիսկ մեկ այլ թուրք լրագրող` Ռեխա Մուխտառն է այդ մասին գրել, ինչին ռուս լրագրողը կարճ է կտրել. «Դա նրա խնդիրն է»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
