Օգոստոսի 16-ին Նոյեմբերյանի քաղաքապետարանում կայացավ համայնքի ավագանու նիստ: Այն վարում էր քաղաքապետ Վանուշ Ամիրաղյանը: Նիստի օրակարգում տարբեր հարցեր էին: Ավագանու անդամներին բաժանվել էին Տավուշի մարզպետ Արմեն Ղուլարյանի կողմից Վանուշ Ամիրաղյանին ուղղված գրության օրինակներ: Այդ գրության մեջ մարզպետը Նոյեմբերյանի քաղաքապետին հայտնում է. «Ի կատարումն 25.06.13թ. ՀՀ փոխվարչապետ, տարածքային կառավարման նախարարի մոտ կայացած խորհրդակցության Մ25/06 արձանագրության 2 կետի ա) ենթակետի հանձնարարականի Ձեզ եմ տրամադրում ՀՀ տարածքային կառավարման նախարարության կողմից իրականացված վերլուծության արդյունքները (տեղեկանքը կցվում է) եւ առաջարկում քննարկել աշխատակազմի աշխատակիցների թվաքանակը ներկայացված օպտիմալ թվաքանակին համապատասխանեցնելու հարցը»:
Ավագանու նիստում քաղաքապետ Վանուշ Ամիրաղյանն ասաց, որ ըստ բնակչության թվաքանակի ճշտված է համայնքապետարանների աշխատակազմի օպտիմալ թվաքանակ: Նոյեմբերյան քաղաքն ունի 5500 բնակիչ, որը համապատասխանում է 5001-10000 բնակիչ ունեցող համայնքների ցանկին: Քաղաքապետի խոսքերով՝ տվյալ ցանկի համայնքապետարանների օպտիմալ աշխատակազմը պետք է լինի 18 մարդ:
«Այժմ քաղաքապետարանում ունենք 26 աշխատող: Հոկտեմբեր ամսին կայանալիք ավագանու նիստում մենք քաղաքապետարանի հաստիքացուցակը պետք է 8-ով պակաս հաստատենք»,-ասաց Վ. Ամիրաղյանը: Քաղաքապետն ասաց, որ սա մեծ խնդիր է իրենց համար:
Նշենք, որ Նոյեմբերյան համայնքի ավագանին քաղաքապետարանի եւ դրա ենթակայությամբ գործող հիմնարկություններում կրճատումներ անելու հարցը քննարկել էր դեռեւս 2012թ. հոկտեմբերի նիստում եւ հավանություն էր տվել դրան: Նոյեմբերյանի քաղաքապետ Վանուշ Ամիրաղյանը մեզ հետ զրույցում ասաց, որ հաջորդ տարեսկզբին կրճատումներ կարվեն նաեւ քաղաքապետարանի ենթակայության տակ գտնվող հիմնարկություններում՝ 2 գրադարաններում, գեղարվեստի դպրոցում եւ այլն: Ներկայումս Նոյեմբերյանի քաղաքապետարանում եւ դրա ենթակայության տակ գտնվող հիմնարկություններում կա 137 աշխատող, ինչը մեծ, ուռճացած թիվ է:
Կարդացեք նաև
Ոսկան ՍԱՐԳՍՅԱՆ
