Նոյեմբերյան քաղաքում օգոստոսի 8-13–ը կայացած «Մարդու իրավունքներից դեպի բացարձակ ժողովրդավարություն» խորագրով ժողովրդավարության ամառային ֆորումին մասնակցած ամերիկյան ընտրական իրավունքի մասնագետ Վրեժ Զատիկյանը, ով ԱՄԿ-ի հիմնադիրներից Ստեփան Զատիկյանի որդին է, իր ելույթում անդրադարձավ նաեւ ամերիկյան բանկային համակարգին:
Բանախոսն ասաց. «Ջոն Քենեդուն սպանեցին: Մյուս նախագահին, որ սպանեցին, դա Լինկոլնն էր: Ահագին զուգահեռներ կան, բայց ամենամեծ զուգահեռն այն է, որ երկուսն էլ ուզում էին կենտրոնական բանկը վերացնել: Ոչ միայն ուզում էին վերացնել, այլեւ երկուսն էլ միակն են ԱՄՆ-ի պատմության մեջ, որ սկսեցին օրինական փող տպել: Ո՞րն է օրինական փողը ԱՄՆ-ում: Սահմանադրությունն ասում է, որ միայն ոսկին եւ արծաթն են օրինական փող: Այսինքն՝ եթե դու պետք է թուղթ տաս ինչ-որ մեկին, այդ թղթի հետեւում պետք է կանգնած լինի ոսկին կամ արծաթը, այսինքն՝ փողը պետք է ապահովված լինի իսկական ինչ-որ բանով, կապիտալով:
Լինկոլը սկսեց նման փողեր տպել, այն ժամանակ ասում էին՝ «գրին դոլար», որովհետեւ այն կանաչ էր՝ բառի բուն իմաստով: Եվ Լինկոլնի սպանությունից հետո բանկը սկսեց մեծանալ: Նույն բանը կատարվում էր Քենեդու ժամանակ, փորձում էին լրիվ ջնջել դոլարի կապը ոսկու եւ արծաթի հետ: Եվ ինքը սկսեց տպել փողեր, որոնք պատկանում էին պետական այն մարմնին, որ պատկանում էր ժողովրդին, այդ փողերի վրա տոկոս չկար: Հիմա ամեն դոլար, որ ստեղծվում է, օդից հնարում են ամեն մի դոլարը, վրան 30 տոկոս հարկ կա: Այնպիսի մի սիստեմ են սարքած, որ պարտքը երբեք չի կարող վերջանալ: Ամեն անգամ, երբ փողեր են մտնում շրջանառության մեջ, պարտքը շատանում է, ոչ միայն կանգ չի առնում, այլ շատանում է: Այսինքն՝ հետդարձի ճանապարհը արդեն վաղուց կորցրել ենք:
Սա Քենեդու ամենամեծ ցավերից էր, երբ նա ուզում էր դառնալ նախագահ: Ասում էր, որ սրանք մեր երկիրը կործանում են: Այն նախագահը, որ բավական շատ էր սիրում հայերին՝ Վուդրո Վիլսոնը իր հրաժեշտի ժամանակ շատ հետաքրքիր խոսքեր ասաց: Նա ասաց. «Հսկա արտադրություն ունեցող մեր երկիրը զոհ է գնում բանկերի այս սիստեմին, որը հիմնված է պարտքի վրա: Ոսկորներս դողում են նողկանքից ,որ ես նման չարիքին թեւեր եմ տվել»: Սա նրա միակ զղջումն էր, երբ նախագահության 8 տարին լրացել էր»:
Կարդացեք նաև
Ոսկան ՍԱՐԳՍՅԱՆ
