Նստացույցի մասնակից Վահագն Մինասյանը երեկ հեռախոսազրույց է ունեցել «Վճարում ենք 100 դրամ» շարժման անդամ Միհրան Մելքոնյանի հետ, ում օրեր առաջ ոստիկանությունը բերման ենթարկեց:
«Իրեն լավ է զգում, այս շաբաթվա վերջ «Վճարում ենք 100 դրամ» նախաձեռնությունից պատվիրակություն կայցելի նրան՝ ի նշան սոլիդարության: Կփորձենք նաեւ փաստաբանի հարցը կարգավորել: Թույլ չենք տալու, որ մեր երկրում քաղբանտարկյալների թիվն ավելանա»,- Aravot.am-ին ասաց Վահագն Մինասյանը:
Հիշեցնենք, որ, ըստ ոստիկանության հաղորդագրության, Միհրանը մի քանի ամիս հետախուզման մեջ է գտնվել, եւ ոստիկանները նրան դժվարացել են գտնել, որովհետեւ այս ակտիվիստը պարբերաբար ոստիկանություն բերման ենթարկվելիս սխալ է նշել հոր անունը:
«Բերման ենթարկվելուց առաջին անգամը ես եմ հետը եղել: Միհրանը ներկայացել է իր տվյալներով: Բացի այդ միայն հայրանունը՝ Վաչիկ կամ Խաչիկ տարբերությունը չի կարող ոստիկանության համար խնդիր լինել նրան գտնելու համար: Եթե ոստիկանության համար հայրանվան ճիշտ կամ սխալ ասելը հիմնավոր պատճառաբանություն է, դա եւս մեկ անգամ հավաստիացնում է, որ ոստիկանությունը՝ ի դեմս ոստիկանապետ Վլադիմիր Գասպարյանի, կատարյալ անգործություն է դրսեւորում կամ հակառակ պարագայում Միհրան Մելքոնյանը քաղբանտարկյալ է: Ինչո՞ւ Միհրանին ձերբակալեցին այն ժամանակ, երբ սկսել էր իր դիրքորոշումն արտահայտել կապված այս երկու պաշտոնյաների պաշտոնանկությունների հետ: Ինչո՞ւ նրան ձերբակալեցին իր անձի նկատմամբ ոտնձգություն կատարելու մասին հաղորդում տալուց մեկ օր հետո, ընդորում այդ ոտնձգությունը կատարվել էր քաղաքապետարանի աշխատակցի կողմից: Ինչո՞ւ հենց հաջորդ օրը նրան առեւանգեցին ու ձերբակալեցին եւ ոչ թե մի քանի օր առաջ: Լռեցնելու ձեւ էր եւ միտում ուներ այս գործընթացը վարկաբեկել ու արժեզրկել: Ով է եղել Միհրանը եւ ինչ արարքներ է թույլ տվել, դա մեր խնդիրը չէ, մենք կազմակերպիչներ չենք եւ պարտավորվածություն չունենք ցանկացած անհատի մասնակցությունը ընդունելուց առաջ իր ամբողջ կենսագրականն ուսումնասիրել եւ հետո նոր միայն հետը համագործակցել»,- ասաց նստացույցի մասնակիցը:
Կարդացեք նաև
Ինչ վերաբերում է Երեւանի փոխոստիկանապետ Վալերի Օսիպյանի պնդմանը, թե Միհրանին կասկածում են հանցագործություն կատարելու մեջ, Վահագն Մինասյանն ասաց. «Ոստիկանության կայքում տեղադրված հաղորդագրությունը հերքեց պարոն Օսիպյանի պնդումները: Միհրանը պայմանական ազատության մեջ է եղել եւ պարտավորված էր պարբերաբար ստորագրել, ինչը չի արել մի քանի ամիս, վստահ եմ անտեղյակության պատճառով: Բայց մի բան շատ տարօրինակ է, եթե նա հունիսի 21-ից գտնվել է հետախուզման մեջ եւ հուլիսի 18-ից մեկ ամիս շարունակ եղել է ոստիկանության ուշադրության կենտրոնում, տեսախցիկների տեսադաշտում, թեկուզ տեսանյութերում կամ տեսահոլովակներում նրան Սպիտակի ոստիկանները կարող էին տեսնել այստեղի ոստիկաններին հայտնել, այնպես որ որեւէ հայրանվան խնդիր չի կարող լինել»:
Արփինե ՍԻՄՈՆՅԱՆ
