«Պետք է տարբերել գիրությունը անորեքսիայից, քանի որ անորեքսիայի հիմքում ընկած են հոգեբանական պատճառները: Դրա համար պարտադիր չի, որ անորեքսիայով տառապող մարդը ի սկզբանե լինի գեր: Անհատը պարզապես չի ընդունում ինքն իրեն որպես նորմալ քաշ ունեցող մարդ»,- այս մասին այսօր «Զարկերակ» մամուլի ակումբում լրագրողների հետ հանդիպման ժամանակ ասաց էնդոկրինոլոգ Բամելա Բաղրամյանը:
Տիկին Բաղրամյանը նշեց, որ ներկայումս գիրությունը շատ ավելի կարևոր և ակտուալ խնդիր է, քան անորեքսիան. «Կանանց մոտ 1,1 %-ն է տառապում անորեքսիայով, իսկ տղամարդկանց 0,25%: Սակայն գիրությամբ է տառապում չափահաս տարիքի ամեն 4-րդ մարդը»:
Հոգեբան Աննա Բադալյանի խոսքերով` այս երկու ֆիզիոլոգիական երևույթների հիմքը հոգեբանական է. «Խորը սթրեսից մարդ կարող է գիրանալ կամ նիհարել: Անհատի մոտ ներքին պայքար է սկսվում և նա չի հաշտվում իրականության հետ: Արդյունքում մարդ կորցնում է դժվարություններ հաղթահարելու ունակությունը»:
Տիկին Բադալյանը խոսեց նաև հոգեբանական ռեգրեսիա տերմինի մասին, որը նույնպես գիրանալու պատճառ կարող է դառնալ: «Հոգեբանական ռեգրեսիայի դեպքում անհատը վերադառնում է մանկություն, որտեղ նրա միակ խնդիրը սնվելը կամ չսնվելն է եղել: Հոգեբանական խնդիրը լուծելու համար պետք է գտնել օջախը， այսինքն` այն կետը， որտեղից սկսվել է ներքին պայքարը»，- ասաց տիկին Բադալյանը:
Կարդացեք նաև
Ըստ էնդոկրինոլոգի` գիրանալու մեջ առկա է նաև ժառանգության գործոնը. «Ապացուցված է, որ կա գեն, որը պատասխանատու է գիրության համար, բայց գենի զարգացման համար նպաստավոր պայմաններ են հարկավոր»:
Բամելա Բաղրամյանը նշեց， որ չգիրանալու համար հարկավոր է ճիշտ սնվել. «Պետք է ուտել քիչ-քիչ， բայց հաճախ` մոտ 4 ժամը մեկ: Ներկայումս երեխաների ճարպակալման պատճառը սխալ սնվելն է， ինչպես նաև նրանց նստակյաց， պասիվ վիճակը: Նիհարելու համար միայն քիչ ուտելը կամ միայն ֆիզիկական աշխատանքը քիչ է: Պետք է համատեղել այս երկուսը， ինչպես նաև նիհարելը սկսել ճիշտ ժամանակին， երբ մարդ գիրացել է 3-5 կիլոգրամով»:
Ինչ վերաբերում է հղիության ժամանակ գիրանալուն， բժիշկ-էնդոկրինոլոգը նշեց， որ մայրանալու շրջանում կանայք սովորաբար ավելի շատ են ուտում. «Մեզ մոտ ընդունված է， որ հղիները պետք է երկուսի փոխարեն ուտեն: Սակայն դա սխալ է: Հղի կինը պետք է լավ սնվի， բայց նրան ավելի շատ հարկավոր են վիտամիններ»:
Էնդոկրինոլոգը խորհուրդ չտվեց օգտագործել դիետաներ կամ նիհարեցնող դեղորայքներ. «Դիետաները մինիմալի են հասցնում կալորիաների քանակը， սակայն կարճատև ազդեցություն են կրում: Դիետա կարելի է պահել， երբ ինչ-որ արարողության համար հարկավոր է շտապ 2-3 կիլոգրամ նիհարել»，- իսկ հոգեբանը հավելեց， որ ցանկացած դիետա պետք է անհատական լինի， որպեսզի առողջական խնդիրներ չառաջացնի:
Տիկին Բաղրամյանը խոսեց նաև գիրության երկու տեսակի` որովայնային և կոնքային գիրության մասին: Նրա խոսքերով` որովայնային գիրությունը ավելի վտանգավոր հետևանքներ ունի， քան կոնքայինը: «Որորվայնային գիրության դեպքում ճարպը ոչ միայն մաշկի ներսում է լինում， այլ տարածվում է ամբողջ որովայնով և շրջապատում տարբեր օրգաններ， որոնք հայտնվում են ճարպային պատյանում»， -ասաց տիկին Բաղրամյանը:
Լուսինե ՇԱԽԱԶԻԶՅԱՆ
