«Պարոն Օսիպյան, ոստիկանները միայն օրենքո՞վ են շարժվում: Եթե նախագահը ձեզ ասի, որ պետք է այսինչ մարդու գլուխն ուտեք՝ չե՞ք ուտելու, գործ չե՞ք սարքելու»,- Երեւանի փոխոստիկանապետ Վալերի Օսիպյանի հետ զրույցում մեր այս հարցին նա պատասխանեց. «Ոստիկանները շարժվում են միայն ու միայն օրենքով, դուք ո՞ր նախագահի հետ եք: Հանրապետության նախագահը, ես վստահ եմ, ավելի ճիշտ՝ համոզված եմ, որ նման բան չի ասի: Պարզապես վստահ եմ: Նման բան ուղղակի հնարավոր չի, բացառում եմ: Ինչ իրականացվում է՝ լինում է միայն օրենքի շրջանակներում»:
Վալերի Օսիպյանը վստահեցրեց, որ ինքը «վերեւներից» հրահանգներ չի ստանում եւ չի կատարում դրանք:
Վալերի Օսիպյանը սկսեց դեպքեր պատմել, երբ լրագրողներն իրենց ճիշտ չեն պահել, հրահանգներով են աշխատել. «Լրագրողին ասում եմ՝ կարո՞ղ եք լուսաբանել, որ ես սփյուռքահային չեմ ասել՝ գնացեք այստեղից, ասում է՝ ոչ: Հարցնում եմ, եթե ես հիմա իրեն հրահրեմ, քաշքշեմ, ասեց՝ անպայման դա կլուսաբանեմ: Հիմա եթե լրագրողները իրենց պարտականությունը պատշաճ իրականացնեն, մեր երկրում ամեն ինչ լավ կլինի: Ես վա՞տ եմ աշխատում»:
Նա վստահեցնում էր, որ հայ ոստիկաններն առհասարակ շատ մեղմ են վարվում ցուցարարների հետ: Նա միջազգային փորձից պատմեց, որ շատ երկրներում ցուցարարներին ոստիկանները գնում են ցրելու՝ զենքով. «Մեր ՀՀ ոստիկանությունը, կլինի մշակութային միջոցառում, սպորտային, քաղաքական, նրանք գնում են ծառայության՝ առանց զենքի»:
Կարդացեք նաև
Մեր դիտարկմանը, որ ոստիկանները մեղմ են վերաբերվում այնքան ժամանակ, քանի դեռ չունեն վերեւներից հատուկ հրահանգ՝ Վալերի Օսիպյանը հերքեց. «Չկա այդպիսի բան»:
Երբ խոսք գնաց, թե ոստիկաններն ինչպես էին վարվում քաղաքացիների հետ ապրիլի 9-ին՝ Վալերի Օսիպյանը զարմացավ. «Ապրիլի 9-ի՞ն, ի՞նչ տեսաք այդ օրը: Դուք տեսաք, որ քաղաքապետարանը առաջարկել էր այլ երթուղի: Միտում կար, մեկ նպատակ էին հետապնդում՝ Բաղրամյանով անպայման բարձրանային, քանի որ այնտեղ տեղի էր ունենում արարողակարգային միջոցառում: Ուզում էին անպայման գնալ, խոչընդոտել, խանգարել»:
Մեր հարցին՝ Դուք հանգիստ քնո՞ւմ եք՝ Վալերի Օսիպյանը պատասխանեց. «Շատ: Անկեղծ եմ ասում՝ շատ հանգիստ, հավատացնում եմ»:
Հռիփսիմե ՋԵԲԵՋՅԱՆ
